لاہور: معاون خصوصی برائےاطلاعات فردوس عاشق اعوان نے کہا ہے کہ کوشش ہوگی اگلے سال ایک ہی دن ملک میں عید ہو۔
تفصیلات کے مطابق فردوس عاشق اعوان نے کہا ہے کہ اگلے سال کوشش کریں گے کہ پورے ملک میں ایک ہی دن عید منائی جائے۔
انھوں نے اپوزیشن لیڈر شہباز شریف پر تنقید کرتے ہوئے کہا کہ وہ لاپتا ہیں ہم چاہتے ہیں واپس آئیں، تتر بتر اپوزیشن ہمیں کیا پریشانی دے سکتی ہے؟
فردوس عاشق کا کہنا تھا کہ اپوزیشن عوام کو بطور ایندھن استعمال کرنا چاہتی ہے، عوام جان چکے کس نے اربوں کی منی لانڈرنگ کی، عوام کو معلوم ہے ان کو اس نہج پر کس نے پہنچایا۔
انھوں نے کہا میرا لاہور پریس کلب سے دیرینہ رشتہ ہے، لاہور سے ابھرنے والی سوچ پورے پاکستان میں پھیل جاتی ہے، ماضی میں پنجاب میں ترقی کا سفر چند شہروں تک محدود کر دیا گیا تھا، لاہور سیاسی سوچ کا قلعہ ہے۔
یہ بھی پڑھیں: خیبرپختونخواہ میں آج عیدالفطر منائی جا رہی ہے
فردوس عاشق کا کہنا تھا کہ ہم جمہوری سوچ والے ہیں، معلوم ہے کہ ووٹ کی عزت کیا ہوتی ہے، وزیر اعظم عمران خان صحافی برادری کے لیے سوچتے ہیں اور صحافی برادری کے مسائل کے تدارک کے لیے ہدایات دیتے ہیں، میں عمران خان کے وژن کی علم بردار ہوں۔
معاون خصوصی نے کہا کہ صحافیوں کو جو سہولتیں ملنے جا رہی ہیں اس میں میرا کمال نہیں، میں نے سہولت کاری کی ہے مگر کریڈٹ وزیر اعظم کو جاتا ہے، میڈیا ورکرز کی ضروریات سے آگاہ ہوں، انٹرم ویج ایوارڈ عید کے بعد نوٹیفائی ہوگا، نئی میڈیا پالیسی عید کے بعد تمام پریس کلبس کو بھیجیں گے۔
