سینیئر اداکار فردوس جمال کے بیٹے بازل فردوس نے اپنے خاندان کو بدنام کرنے پر یوٹیوبرز کو آخری وارننگ دیدی ہے۔
گزشتہ دنوں یہ خبر سامنے آئی تھی کہ فردوس جمال کی اہلیہ نے خلع کے لیے عدالت میں درخواست دائر کی ہے اور فردوس جمال اہلیہ اور بیٹوں سے جھگڑے کے باعث اپنے خاندان سے دور الگ رہ رہے ہیں جس کے باعث وہ کئی دنوں تک خبروں میں رہے اس دوران انہوں نے یوٹیوبرز کو انٹرویوز بھی دیے۔
اب فردوس جمال کے بیٹے بازل فردوس نے ایک پیغام کے ذریعے اپنے خاندان کو بدنام کرنے پر یوٹیوبر کو تنقید کا نشانہ بنایا ہے، انہوں نے درخواست کی کہ وہ اپنی خبروں میں خاندان کی تصاویر کا استعمال کرنا بند کریں۔
بازل فردوس نے کہا کہ سوشل میڈیا پر بہت سی ویڈیوز گردش کر رہی ہیں جس میں میری والدہ، بہنوں اور اہلیہ کو ڈسکس کیا جا رہا ہے یہ سب دیکھنا بہت تکلیف دہ ہے۔
اداکار کے بیٹے نے کہا کہ میں ان تمام یو ٹیوبرز کو آخری وارننگ دے رہا ہوں جو ویووز حاصل کرنے کے لیے ویڈیوز بنا رہے ہیں وہ ایسا کرنا بند کر دیں۔
انہوں نے مزید کہا کہ ہمارا تعلق ایک پٹھان فیملی سے ہے اور ہم اپنی عورتوں کو سوشل میڈیا پر نہیں لے کر آتے میرے خاندان کی خواتین کو میڈیا میں کوئی دلچسپی نہیں ہے۔
فردوس جمال نے اہلیہ سے علیحدگی کی خبروں پر خاموشی توڑ دی
اداکار کے بیٹے کا کہنا تھا کہ اگر یوٹیوبرز نے یہ سلسلہ بند نہیں کیا تو میں سب کے خلاف ایف آئی آر کٹواؤگا، اور میری عوام سے بھی درخواست ہے کہ کوئی بھی بات سن کر اس پر رائے قائم نہ کریں۔
واضح رہے کہ فردوس جمال نے حال ہی میں ایک پوڈ کاسٹ میں شرکت کی جس میں مختلف سوالات کا جواب دیتے ہوئے ان کا کہنا تھا کہ میں نے بچوں کو بیرون ملک تعلیم دی، گھر بنایا، انہیں گاڑیاں لے کر دیں لیکن آج میرے پاس کوئی گاڑی، کوئی گھر نہیں ہےکیوں کہ میں نے اپنا سب کچھ ان کو دے دیا۔
