شیخوپورہ: فائر بریگیڈ کے اہلکار کو 2 ماہ کی تنخواہ نہ ملنے کا بیان وائرل ہونے کے بعد ڈی سی سرمد کی جانب سے نوٹس لے لیا گیا۔
اے آر وائی نیوز کے مطابق فائر بریگیڈ کے اہلکاروں کی 2 ماہ سے تنخواہوں سے محرومی کے بعد اہلکار تیمور کو بیان وائرل ہوا تھا، جس میں انکشاف کیا گیا تھا کہ میونسپل کارپوریشن کے عملے کو گزشتہ 2 ماہ سے تنخواہ نہیں مل رہی ہیں۔
ملازم کا اپنے بیان میں کہنا تھا کہ ملازمین کے گھروں میں فاقے ہورہے ہیں، گھروں میں بجلی کے میٹرتک کٹ گئے۔
ڈی سی سرمد کی جانب سے اہلکار تیمور کے وائرل ہونے والے بیان کا نوٹس لے لیا گیا ہے، انھوں نے عملے کی تنخواہیں ادا کرنے کا حکم دیا ہے۔
چیف آفیسرمیونسپل کارپوریشن نے عملے کی تنخواہوں کے چیک بنا دیے ہیں جب کہ ایڈمنسٹریٹر سے تنخواہوں کی عدم ادائیگی پر انکوائری رپورٹ طلب کر لی گئی ہے۔
