لاہور: صوبہ پنجاب کے دارالحکومت لاہور کے نیو انار کلی میں واقع پلازہ میں لگنے والی آگ پر کئی گھنٹوں بعد بھی قابو نہ پایا جا سکا۔ متاثرہ دکاندار حکومت کے خلاف پھٹ پڑے۔
تفصیلات کے مطابق لاہور کے نیو انار کلی بازار میں واقع پلازہ میں خوفناک آگ بھڑک اٹھی۔
ریسکیو ذرائع کے مطابق پلازہ کے بیسمنٹ میں لگنے والی آگ نے دیکھتے ہی دیکھتے کئی دکانوں کو اپنی لپیٹ میں لے لیا۔
تاجر اپنی دکانوں کو جلتا دیکھ کر فائر بریگیڈ اہلکاروں سے لڑ پڑے۔ بعض تاجر بے بسی سے رو تے رہے۔
ریسکیو حکام کے مطابق ریڈی میڈ گارمنٹس کی دکانوں میں رات 4 بجے شارٹ سرکٹ کے باعث آگ لگی جس نے لاکھوں کا سامان جلا کر خاکستر کردیا۔
تاجروں نے الزام لگایا کہ آگ پر فوری قابو پانے کے لیے ریسکیو اہلکاروں کے پاس مطلوبہ آلات ہی موجود نہیں تھے۔دوسری جانب ریسکیو حکام کا کہنا ہے کہ تاجروں نے ان کو کام کرنے نہیں دیا۔
دکانداروں نے حکومت کے خلاف زبردست احتجاج کرتے ہوئے نعرہ بازی کی۔
وزیر اعلیٰ پنجاب نے آتش زدگی کے واقعے کی رپورٹ طلب کرلی۔
یاد رہے کہ رواں ماہ یکم اپریل کو بھی انار کلی کے شاپنگ پلازہ میں آتشزدگی کا واقعہ پیش آیا تھا۔
مزید پڑھیں: انار کلی گنپت روڈ پر پلازہ میں آتش زدگی
آگ کی وجہ سے پلازہ کی 21 دکانیں اور ان میں موجود سامان جل کر خاکستر ہوگیا تھا۔