اسلام آباد: ستارہ مارکیٹ میں نامعلوم کی فائرنگ سے تحریک انصاف کے مقامی رہنماء چوہدری نثار علی خان شدید زخمی ہوئے جنہیں طبی امداد کے لیے اسپتال منتقل کیا گیا تاہم وہ جانبر نہ ہوسکے۔
نمائندہ اے آر وائی ذوالقرنین حیدر کے مطابق اسلام آباد تھانہ آبپارہ کی حدود میں واقع ستارہ مارکیٹ میں فائرنگ کا واقعہ پیش آیا جس کے نتیجے میں تحریک انصاف کے مقامی رہنماء شدید زخمی ہوئے۔
فائرنگ کے واقعے میں زخمی ہونے والے چوہدری نثار کو اسپتال منتقل کیا گیا تاہم وہ زخموں کی تاب نہ لاتے ہوئے دم توڑ گئے، اسپتال انتظامیہ نے موت کی تصدیق کرتے ہوئے کہا کہ مقتول کو چار گولیاں لگی تھیں۔
تحریک انصاف کے رہنماء کی ہلاکت کے بعد ستارہ مارکیٹ کے تاجروں نے قریبی سڑک پر شدید احتجاج کیا اور سڑک پر ٹائر جلائے اور پولیس سے مطالبہ کیا کہ تاجر کے قاتلوں کو فوری طور پر گرفتار کیا جائے۔
فائرنگ کے بعد تھانہ آبپارہ کی بھاری نفری نے جائے وقوعہ پہنچ کر تحقیقات کا آغاز کردیا جبکہ وہاں سے ملنے والے خول اور مقتول کا موبائل فون قبضے میں لے کر تحقیقات کا آغاز کردیا گیا ہے۔
پولیس نے مظاہرین کو یقین دہانی کروائی ہے کہ سی سی ٹی وی فوٹیج کی مدد سے جلد قاتلوں کو گرفتار کر کے قانون کی گرفت میں لایا جائے گا، دوسری جانب تاجر برادری نے واقعے کے خلاف مارکیٹ کی تمام دکانوں کو بند کردیا ہے۔
