اسلام آباد: پاکستان نے کابل میں ناظم الامور عبید الرحمان نظامانی پر حملے کی شدید مذمت کرتے ہوئے افغان حکومت پر زور دیا ہے کہ وہ پاکستانی سفارتی مشن کے تحفظ کے اقدامات کریں۔
ترجمان دفتر خارجہ کی جانب سےجاری بیان میں کہا گیا کہ کابل میں پاکستانی سفارتخانے پرحملہ کیا گیا، حملےمیں ناظم الامورعبید الرحمان نظامانی کونشانہ بنایا گیا، ناظم الامورکوبچاتےہوئےگارڈ اسرارمحمد شدید زخمی ہوئے۔
ترجمان دفترخارجہ نے کہا کہ پاکستان کابل میں ناظم الامور پر حملے کی مذمت کرتاہے،افغان عبوری حکومت حملے کی تحقیقات کرے اور افغانستان میں پاکستانی سفارتی مشن کے تحفظ کیلئےاقدامات کیےجائیں۔
یہ بھی پڑھیں: کابل میں پاکستانی سفارتی حکام پر فائرنگ، گارڈ زخمی
ادھر کابل میں پاکستانی سفارتخانے کے ترجمان طاہرنواز نے اےآر وائی نیوز سے خصوصی گفتگو کرتے ہوئے بتایا کہ کچھ شرپسند عناصر نے سفارت خانے کے باہر فائرنگ کی۔
طاہرنواز نے بتایا کہ شرپسندوں کی فائرنگ سے سیکیورٹی گارڈ اسرارمحمد شدید زخمی ہوئے، حملہ آورکون تھےتاحال کچھ نہیں پتہ لگ سکا؟ تاہم سفارتخانےمیں موجودتمام پاکستانی عملہ محفوظ ہے۔
واضح رہے کہ کابل میں پاکستانی سفارت خانے پر حملے کے بعد پاکستانی ناظم الامور و دیگر حکام کو وقتی طور پر واپس بلایا جارہا ہے۔
