اسلام آباد: وزیرِ اعظم عمران خان اپنے پہلے غیر ملکی دورے پر آج سعودی عرب کے لیے روانہ ہوں گے، دو روزہ سرکاری دورے میں وہ سعودی عرب کے بعد متحدہ عرب امارات بھی جائیں گے۔
تفصیلات کے مطابق دفترِ خارجہ سے جاری اعلامیے میں کہا گیا ہے کہ وزیرِ اعظم دو روزہ غیر ملکی دورے کے پہلے مرحلے پر سعودی عرب روانہ ہوں گے، وزیرِ اعظم سعودی فرماں روا اور ولی عہد کی دعوت پر دورہ کر رہے ہیں۔
ترجمان دفترِ خارجہ کے مطابق اس دورے میں خارجہ اور خزانہ کے وفاقی وزرا اور مشیرِ تجارت بھی وزیرِ اعظم کے ہم راہ ہوں گے، وزیرِ اعظم سعودی فرماں روا اور ولی عہد سے الگ الگ ملاقاتیں کریں گے۔
دفترِ خارجہ کا کہنا ہے کہ سعودی فرماں روا وزیرِ اعظم عمران خان کے اعزاز میں شاہی محل میں ضیافت بھی دیں گے، جب کہ وزیرِ اعظم مدینہ منوّرہ میں زیارت اور عمرہ کی سعادت بھی حاصل کریں گے۔
دفترِ خارجہ کے ترجمان کے مطابق وزیرِ اعظم کے ہم راہ جانے والے وزرا اپنے سعودی ہم منصب سے ملاقاتیں کریں گے، وزیرِ اعظم سے او آئی سی کے سیکریٹری جنرل بھی ملاقات کریں گے۔
یہ بھی پڑھیں: وزیراعظم ہاؤس کی 102 گاڑیوں کی نیلامی جاری، 75 گاڑیاں فروخت
وفاقی وزیرِ خارجہ شاہ محمود قریشی نے کہا کہ سعودی عرب کے ساتھ پاکستان کے دیرینہ تعلقات ہیں، ملاقات کے ذریعے دونوں ممالک کے درمیان حالیہ فاصلے کم کریں گے۔
دفترِ خارجہ کے اعلامیے کے مطابق وزیرِ اعظم بدھ کی شام وفد کے ہم راہ متحدہ عرب امارات پہنچیں گے، جہاں یو اے ای کے ولی عہد ان کا ایئر پورٹ پر استقبال کریں گے۔ ترجمان کا کہنا ہے کہ وزیرِ اعظم متحدہ عرب امارات کے ولی عہد کی دعوت پر دورہ کر رہے ہیں۔
