کراچی : نئے سال کے پہلے مہینے میں مکمل سورج گرہن کے بعد مکمل چاند گرہن کا نظارہ آج دیکھا جا سکے گا،ماہرین نے اس چاند کو ‘وولف مون’ کا نام دیاہے۔
تفصیلات کے مطابق رواں سال کا پہلاچاند گرہن آج درمیانی شب ہو گا، جوپاکستان سمیت دنیا کے بیشتر ممالک میں دیکھا جاسکے گا، چاند کو گرہن لگنے کا عمل پاکستانی وقت کے مطابق رات دس بجکر آٹھ منٹ پر شروع ہوگا، چاند کو مکمل گرہن بارہ بج کر دس منٹ لگے گا اور چاند گرہن کا اختتام رات دو بج کر گیارہ منٹ پرہوگا۔
ماہرین نے اس مکمل چاندگرہن کو وولف مون کا نام دیا ہے، چاندگرہن ایشیا،یورپ، افریقہ اورآسٹریلیا کےبیشترملکوں میں دیکھا جائےگا۔
خیال رہے سال 2020 میں 2چاند اور 2سورج گرہن ہوں گے، پہلا چاند گرہن 10اور 11جنوری کی درمیا نی شب اور دوسرا چاند گرہن 5اور 6جون کی درمیانی شب کو ہوگا جبکہ پہلا سورج گرہن 21جون کو ہوگا، جو پاکستان میں بھی نظر آئے گا۔
یاد رہے کہ ا س قبل گزشتہ سال کا آخر ی سورج گرہن 26 دسمبر کو ہوا جس کا نظارہ پوری دنیا میں دیکھا گیا اس کا دورانیہ چھ گھنٹے تک رہا۔ طاقت ور ترین سورج گرہن کو ماہرین نے رنگ آف فائر کا نام بھی دیا تھا۔
چاند گرہن کیا ہے؟
زمین کا وہ سایہ جو گردش کے دوران کرہ زمین کے چاند اور سورج کے درمیان آ جانے سے چاند کی سطح پر پڑتا ہے اور چاند تاریک نظر آنے لگتا ہے، اُسے چاند گرہن کہتے ہیں۔
چاند گرہن کبھی جزوی ہوتا ہے اور کبھی پورا کیونکہ یہ اس کی گردش پر منحصر ہوتا ہے، چونکہ زمین اور چاند دونوں سورج سے روشنی حاصل کرتے ہیں اس لیے زمین سورج کے گرد اپنے مقررہ مدار پر گھومتی ہے اور چاند زمین کے گرد اپنے مدار پر گھومتا ہے۔
