پشاور: چیئرمین رویت ہلال کمیٹی مولانا عبدالخبیر آزاد نے کہا ہے کہ مرکزی رویت ہلال کمیٹی کا پہلا اجلاس 13 اپریل کو پشاور میں ہوگا۔
تفصیلات کے مطابق مولانا عبدالخبیر آزاد نے پشاور میں پریس کانفرنس میں کہا کہ ہم پورے ملک میں اتحاد و اتفاق کے لیے کوشش کر رہے ہیں، رویت ہلال کمیٹی کے اجلاس تمام بڑے شہروں میں ہوں گے۔
مولانا عبدالخبیر کا کہنا تھا پشاور میں اجلاس کا مقصد اتحاد و اتفاق کا پیغام دینا ہے، اس سلسلے میں کمیٹی کو تمام علما و مشائخ کا تعاون حاصل ہے، حکومت اور وزارت مذہبی امور کا بھی بھرپور تعاون ہے۔
انھوں نے کہا چاند دیکھے جانے کے سلسلے میں جو بھی شہادت آئے گی، اس پر شرعی لحاظ سے فیصلہ کیا جائے گا، اور انشاء اللہ پورے ملک میں ایک ہی دن روزہ رکھا جائے گا۔
ایک ہی دن روزہ اور عید منانے کیلئے کوششیں تیز
چیئرمین رویت ہلال کمیٹی نے کہا ہمیں کرونا وبا کی لہر سے عوام کو بچانے کے لیے بھی اپنا کردار ادا کرنا چاہیے، اور این سی او سی کی گائیڈ لائنز پر عمل کرنا چاہیے۔
واضح رہے کہ ملک بھر میں ایک ہی دن روزہ اور عید منانے کی کوششیں تیز کر دی گئی ہیں، گزشتہ روز اس سلسلے میں ایک ملاقات میں وفاقی وزیر فواد چوہدری اور چیئرمین رویت ہلال کمیٹی نے اتفاق رائے پیدا کرنے کی کوششیں کرنے کا اعادہ بھی کیا تھا۔ عبدالخبیر آزاد نے آبزرویٹری کی افتتاحی تقریب میں شرکت کی یقین دہانی کرائی تھی اور موبائل فون میں وزارت کی تیار کردہ چاند دیکھنے کی ایپ بھی حاصل کی۔
