کرسمس کی آمدآمد ہے اور اس موقع پر پاکستان میں پہلی بار مسلم کرسچن کرسمس سانگ ریلیز کیا گیا ہے، اس گانے کا مقصد مذاہب کے درمیان ہم آہنگی کا فروغ ہے۔
تفصیلات کے مطابق پاکستان کےمیوزک کی تاریخ میں پہلی بار ایسا ہوا ہے کہ کرسمس کے موقع پر جاری کیا جانے والا گانے مسلمان اورعیسائی دونوں نظریات کی ترجمانی کررہا ہو۔
اس گانے کے گلوکار حیدر چاؤ اور مشعل سباسچیٔن ہیں جبکہ گانے کا تصور علی ارمان بلتستانی نامی میوزک ڈائریکٹر کے ذہن کی پیداوار ہے جو کہ مذاہب کے درمیان ہم آہنگی اورمعاشرے میں رواداری پر یقین رکھتے ہیں۔
گانے کا کانسپٹ ، اور پراڈکشن کے تمام مراحل علی ارمان کے ہی چشمِ تصور کا نتیجہ ہیں اور اسے ٹی این اے ریکارڈز نامی کمپنی نے ریلیز کیا ہے۔ گانے کی موسیقی عامر قریشی نے ترتیب دی ہے جبکہ اسے او ڈی ایس اسٹوڈیو میں ریکارڈ کیا گیا ہے۔
اس منفرد گانے کا مرکزی خیال خدا کی وحدانیت کے گرد قائم کیا گیا ہے کہ جب ہمارا خدا ایک ہے اور ہم ایک ہی دنیا میں رہتے ہیں تو پھر ہماری خوشی اور ہمارے غم کیوں ہم آہنگ نہیں ہوسکتے ۔
یاد رہے کہ آج کی شام کرسمس کی شام ہے اور اس موقع پر پاکستان سمیت دنیا بھر میں آباد مسیحی برادری حضرت عیسیٰ کی پیدائش کا جشن مناتی ہے۔ عیسائت میں اس دن کو عید کی اہمیت حاصل ہے اور پاکستان میں اس موقع پر خصوصی پروگرامز کا انعقاد کیا جاتا ہے۔
