اسلام آباد: وزیر اعظم عمران خان کی ہدایت پر پہلا پروٹو ٹائپ شیلٹر مکمل ہو گیا ہے، ذرایع کا کہنا ہے کہ وزیر اعظم آج ترلائی میں ڈماڈل پناہ گاہ کا دورہ کریں گے۔
اے آر وائی نیوز کے مطابق وزیر اعظم کی ہدایت پر پہلی پروٹو ٹائپ پناہ گاہ قائم کر لی گئی، یہ پناہ گاہ ترلائی اسلام آباد کے علاقے ڈماڈل میں واقع ہے۔
ذرایع کا کہنا ہے کہ وزیر اعظم عمران خان آج ترلائی اسلام آباد میں ڈماڈل پناہ گاہ کا دورہ کریں گے، وزیر اعظم کو پناہ گاہ کے انتظامی امور کے بارے میں بریفنگ دی جائے گی۔
واضح رہے کہ وزیر اعظم کی ہدایت پر ترلائی میں پہلا پروٹو ٹائپ شیلٹر ہوم ایک ماہ سے بھی کم وقت میں تیار کیا گیا ہے۔
رواں ماہ 3 ستمبر کو معاون خصوصی ثانیہ نشتر نے ترلائی اسلام آباد میں واقع پناہ گاہ کا دورہ کیا تھا، انھوں نے پناہ گاہ میں تزئین و آرائش کے کام کا جائزہ لیا، ان کا کہنا تھا یہ سارا کام احساس کی چھتری تلے پاکستان بیت المال کی زیر نگرانی کیا گیا ہے تاکہ مزدوروں کو با وقار انداز میں بہترین کھانا اور رہائشی ماحول فراہم کیا جا سکے۔
وزیراعظم کی اسلام آباد کی پناہ گاہوں کو ماڈل پناہ گاہیں بنانے کی ہدایت
یاد رہے کہ گزشتہ ماہ وزیر اعظم نے اسلام آباد کی پناہ گاہوں کو ماڈل پناہ گاہیں بنانے کی ہدایت کرتے ہوئے کہا تھا کہ ماڈل پناہ گاہوں کا دائرہ کار دوسرے صوبوں تک بھی بڑھایا جائے گا۔
وزیر اعظم عمران خان نے ہدایت کی تھی بے گھر افراد اور مزدوروں کو پناہ گاہوں میں معیاری سہولیات فراہم کی جائیں، پناہ گاہوں میں عملے کی تربیت اور سہولیات کا باقاعدہ جائزہ لیا جائے۔
