کراچی: سندھ حکومت کی جانب سے شہر قائد میں کو وِڈ 19 سمیت وبائی امراض کے پہلے خصوصی اسپتال کا قیام جلد ہونے جا رہا ہے۔
اے آر وائی نیوز کے نمائندے اصغر عمر نے بتایا کہ کراچی میں کرونا سمیت دیگر وبائی امراض کے لیے ایک خصوصی اسپتال کے قیام پر کام جاری ہے، 30 جون کو نیپا چورنگی پر 200 بستروں کا اسپتال مکمل ہو جائے گا۔
یہ اسپتال ڈاؤ یونی ورسٹی آف ہیلتھ سائنسز کی زیر نگرانی تیار کیا جا رہا ہے، آئی سی یو تقریباً مکمل ہو چکا ہے، اسپتال کی تکمیل جولائی میں ہونا تھی، تاہم کرونا مریضوں میں اضافے کے باعث اسپتال کی تعمیر جلد کی گئی۔
سندھ حکومت نے مذکورہ مقام پر اسپتال کے پرانے منصوبے کو اب کرونا سمیت دیگر وبائی امراض کے لیے اسپتال کے منصوبے میں بدلا ہے، اسپتال کی تیاری کی ذمہ داری ڈاؤ یونی ورسٹی آف ہیلتھ سائنسز کو دی گئی ہے۔
کرونا کے بڑھتے کیسز، سندھ حکومت کا مزید 5 اسپتال قائم کرنے کا اعلان
گزشتہ برس اکتوبر میں سندھ کی وزیر صحت ڈاکٹر عزرا پیچوہو نے نیپا چورنگی پر اسپتال کے لیے نئی تعمیر شدہ اس عمارت کو آپریشنل کرنے کے لیے نیشنل انسٹی ٹیوٹ آف کارڈیو ویسکولر ڈیزیز (این آئی سی وی ڈی) کو سونپنے کا بھی عندیہ دیا تھا۔
واضح رہے کہ اس منصوبے کے حوالے سے رکن سندھ اسمبلی ارسلان تاج نے سندھ حکومت کو تنقید کا نشانہ بناتے ہوئے کہا تھا کہ گلشن اقبال میں قائم یہ اسپتال آج کا نہیں 11 سال پہلے کا منصوبہ ہے، اس منصوبے کا نام کئی بار تبدیل کیا گیا۔
