بلاوائیو: پاکستان نے زمبابوے کو پہلے ٹی ٹوئنٹی میں 57 رنز سے شکست دے کر تین میچوں کے سیریز میں 1-0 کی برتری حاصل کرلی۔
زمبابوے کی ٹیم 166 رنز کے ہدف کے تعاقب میں 108 رنز پر ڈھیر ہوگئی، ایک مرحلے پر 77 رنز رپ زمبابوے کے صرف 2 کھلاڑی آؤٹ تھے، تاہم اوپنر تادیوانشے مارومانی کے رن آؤٹ ہوتے ہیں میچ کا پانسہ پلٹ گیا۔
میزبان ٹیم کی آخری 8 وکٹیں صرف 31 رنز کے اضافے سے گریں، کپتان سکندر رضا 39 اور وکٹ کیپر بیٹر مارومانی 33 رنز بناکر نمایاں رہے۔
زمبابوے کے 9 بلےباز ڈبل فیگرمیں بھی داخل نہ ہوسکے، پاکستان کی طرف سے سفیان مقیم اور ابرار احمد نے 3،3 وکٹیں حاصل کیں، طیب طاہر کو 39 رنز کی اننگز پر میچ کا بہترین کھلاڑی قرار دیا گیا۔
اس سے قبل پاکستان نے ٹی ٹوئنٹی میچ میں پہلے کھیل کر 4 وکٹوں کے نقصان پر165 رنز بنائے، طیب طاہر نے 25 گیندوں پر 39 رنز کی ناقابل شکست اننگز کھیلی، محمد عرفان خان نے 15 گیندوں پر جارحانہ 27 رنز اسکور کیے۔
گرین شرٹس کی طرف سے عثمان خان نے 30 گیندوں پر 39 رنز بنائے جبکہ اوپنر صائم ایوب نے 18 گیندوں پر 24 رنز کی اننگز کھیلی۔
زمبابوے کی طرف سے سکندر رضا نے 14 رنز دیکر ایک وکٹ حاصل کی، مساکاڈزا، ریان برل اور رچرڈ نگارا وا بھی 1،1 وکٹ حاصل کرنے میں کامیاب رہے۔
بلاوائیو میں قومی کپتان سلمان علی آغا نے ٹاس جیت کر پہلے بیٹنگ کا فیصلہ کیا اور قومی ٹیم نے 5 اوورز ایک وکٹ کے نقصان پر 50 رنز بنائے تھے۔
پاکستان کی جانب سے اننگ کا آغاز صائم ایوب اور عمیر یوسف نے کیا۔ پہلی وکٹ کے لیے 18 کے مجموعی اسکور پر گری جب عمیر یوسف 16 رنز بنا کر نگاروا کی وکٹ بن گئے۔
کریز پر صائم ایوب 20 اور عثمان خان 13 رنز کے ساتھ موجود ہیں۔
قبل ازیں ٹاس جیتنے کے بعد سلمان علی آغا نے کہا کہ سیریز میں نوجوان کھلاڑیوں کو اپنی صلاحیتیں منوانے کا موقع دیا ہے۔ بڑا ٹوٹل بنانے اور سیریز جیتنے کی کوشش کریں گے۔
ٹی ٹوئنٹی فارمیٹ میں شاہین زمبابوے کے مقابل تاحال نا قابل شکست ہیں۔ دونوں ٹیموں نے اب تک 6 میچز کھیلے ہیں اور تمام میں گرین شرٹس نے فتح سمیٹی ہے۔
واضح رہے کہ گرین شرٹس نے رواں دورے میں ہی زمبابوے کو تین ون ڈے میچوں پر مشتمل سیریز میں دو، ایک سے شکست دی ہے۔
