تین ٹیسٹ میچوں کی سیریز کے پرتھ میں کھیلے جا رہے پہلے ٹیسٹ میچ میں میزبان آسٹریلیا نے پاکستان کو 360 رنز کے بڑے مارجن سے شکست دے دی۔
پاک آسٹریلیا کی تین ٹیسٹ میچوں پر مشتمل سیریز کے پرتھ میں کھیلے جانے والے میچ کا فیصلہ چوتھے روز ہی ہو گیا اور میزبان ٹیم نے پاکستان کو 360 رنز کے بھاری مارجن سے شکست دے کر ایک صفر کی برتری حاصل کر لی۔
اس میچ میں پاکستان کی بولنگ اور بیٹنگ دونوں ہی ناکام رہیں جب کہ رہی سہی کسر خراب فیلڈنگ میں پوری کر دی۔
میچ کے چوتھے روز آسٹریلیا کی جانب سے جیت کے لیے دیے گئے 450 رنز کے ہدف کے تعاقب میں پاکستان کی پوری ٹیم 89 رنز پر آؤٹ ہوگئی۔
مڈل آرڈر نوجوان بلے باز سعود شکیل 24، بابر اعظم 14 اور امام الحق 10 رنز ہی بنا سکے جب کہ باقی 8 کھلاڑی ڈبل فیگر میں بھی داخل نہ ہو سکے۔ ٹور میچ میں ڈبل سنچری بنانے والے کپتان شان مسعود پرتھ ٹیسٹ کی دونوں اننگز میں ناکام رہے۔
آسٹریلیا کی جانب سے مچل اسٹارک اور جوش ہیزل ووڈ نے 3،3 وکٹیں حاصل کیں۔ اس میچ میں کینگرو بولر نیتھن لیون نے ٹیسٹ کرکٹ میں 500 وکٹیں حاصل کرنے کا اعزاز بھی حاصل کیا۔
اس سے قبل آسٹریلیا نے چوتھے روز اپنی دوسری نا مکمل اننگ 2 وکٹوں پر 84 رنز کے ساتھ کیا اور کھانے کے وقفے کے بعد 5 وکٹوں پر 233 رنز بنا کر اننگ ڈیکلیئر کر دی۔ اوپنر عثمان خواجہ 90 رنز بنا کر ٹاپ اسکورر رہے، ان کی وکٹ شاہین شاہ نے حاصل کی۔
مچل مارش نے دوسری اننگ میں بھی نصف سنچری اسکور کی اور 63 رنز کے ساتھ ناٹ آؤٹ رہے جب کہ اسٹیون اسمتھ اور ٹریوس ہیڈ بالترتیب 45 اور 14 رنز بنا کر آؤٹ ہوئے۔
پاکستان کی جانب سے خرم شہزاد نے تین جب کہ شاہین شاہ اور عامر جمال نے ایک، ایک وکٹ حاصل کی۔
یاد رہے کہ میچ کے تیسرے روز پاکستانی ٹیم 271 رنز پر ڈھیر ہوگئی ہو کر فالو آن کا شکار ہو گئی تھی تاہم میزبان آسٹریلیا نے فالو آن کے بجائے خود بیٹنگ کو ترجیح دی اور 216 رنز کی برتری کے ساتھ دوسری اننگ کا آغاز کیا۔
پاکستان کی جانب سے کوئی بھی بیٹر بڑی اننگ کھیلنے میں ناکام رہا۔ امام الحق 62 رنز بنا کر ٹاپ اسکورر رہے جب کہ کپتان شان مسعود 30، عبداللہ شفیق 42 رنز کے ساتھ دوسرے نمایاں بیٹرز رہے۔
آسٹریلیا پہلی اننگ میں 487 رنز بنا کر آؤٹ ہوئی تھی۔ اپنے کیریئر کی آخری سیریز کھیلنے والے ڈیوڈ وارنر نے 164 رنز کی شاندار اننگ کھیلی تھی۔
