ملکی تاریخ میں پہلی بار آرٹیفیشل انٹیلی جنس ( اے آئی) یعنی مصنوعی ذہانت کی مدد سے ایک گانا تیار کیا گیا ہے جسے بہت پسند بھی کیا جارہا ہے۔
پاکستان کے آئی ٹی کے ماہر نے کمال مہارت کا مظاہرہ کرتے ہوئے ایک ایسا گانا متعارف کرایا ہے جس نے سننے والوں کو بھی خوشگوار حیرت میں مبتلا کردیا۔
اے آر وائی نیوز کے پروگرام باخبر سویرا میں اس گانے کے خالق اور آئی ٹی ایکسپرٹ امجد میانداد نے اپنی اس شاندار کاوش کے بارے میں ناظرین کو آگاہ کیا۔
انہوں نے بتایا کہ اس گانے کی شاعری میں نے خود لکھی ہے، مکسنگ ، ایڈیٹنگ اور ایفیکٹس بھی میرے ہیں لیکن آواز کمپیوٹر کی ہے اور اس کی ویڈیو میں کچھ مناظر اے آئی سے لیے گئے ہیں جبکہ دیگر فوٹیجز بھی ہیں جس کا کریڈٹ متلقہ فنکاروں کو بھی دیا ہے۔
انہوں نے بتایا کہ میرے گانے کی انفرادیت یہی ہے کہ اس کی آواز کسی اور گلوکار سے نہیں ملتی یہ ایک نئی آواز اور نیا کام ہے اس سے پہلے گانوں کو کمپیوٹر کے ذریعے ری مکس کیا جاتا تھا۔
واضح رہے کہ اس سے قبل ملکی تاریخ میں پہلی بار پاکستان کے مقامی نیوز چینلز کی جانب سے آرٹیفیشل انٹیلی جنس ( اے آئی) یعنی مصنوعی ذہانت سے لیس نیوز اینکرز بھی متعارف کرائے جاچکے ہیں۔
