سکھر : روہڑی کے قریب فش ہچری میں پانی کی قلت کے باعث سینکڑوں مچھلیاں ہلاک ہوگئیں، ہچری کے 8 سے زائد تالاب مکمل طور پر سوکھ گئے ہیں۔
تفصیلات کے مطابق روہڑی کے قریب فشریز ڈپارٹمنٹ کے قائم فش ہچری میں پانی کی شدید قلت کے باعث مچھلیاں مرنے لگی ، فش ہچری کے 8 سے زائد تالاب مکمل طور پر سوکھ گئے ہیں جن میں موجود سینکڑوں مچھلیاں مر چکی ہے.
ڈائریکٹر فشریز سکھر محمد علی شیخ نے بتایا کہ پانی کی شدید قلت کے باعث سینکڑوں مچھلیاں ہلاک ہو گئی ہیں، جبکہ مزید نقصان کا خدشہ بھی ظاہر کیا جا رہا ہے.
محمد علی شیخ کا کہنا تھا کہ ہچری کے پانچ تالابوں میں پانی کی شدید قلت پیدا ہو گئی ہے، جس کی بنیادی وجہ مسلسل بجلی کی لوڈ شیڈنگ ہے۔ ان تالابوں کو ٹیوب ویلز کے ذریعے پانی فراہم کیا جاتا ہے، لیکن بجلی کی عدم دستیابی کے باعث پانی کی فراہمی متاثر ہوئی ہے۔
انہوں نے مزید بتایا کہ پانی کی قلت اور سخت گرمی کی وجہ سے مچھلیاں تڑپ تڑپ کر مر رہی ہیں، مچھلیوں کی انڈے دینے کا سیزن بھی شروع ہونے والا ہے اور اگر فوری طور پر پانی کی فراہمی بحال نہ کی گئی تو مزید مچھلیاں مرنے کا خدشہ ہے۔
فشریز سے حکام اور اہل علاقہ کا کہنا ہے کہ متعلقہ اداروں سے آبی حیات اور فش ہچری کو مکمل تباہی سے بچانے کیلئے عملی اقدامات کرنے کی ضرورت ہے۔
