ملک کے بیشتر علاقوں میں آج بھی گرج چمک کے ساتھ بارش کا امکان ہے، محکمہ موسمیات نے خیبر پختونخوا میں سیلاب کا خطرہ طاہر کیا ہے۔
اے آر وائی نیوز کی رپورٹ کے مطابق محکمہ موسمیات نے آئندہ چوبیس گھنٹے کے دوران کراچی، کوئٹہ، لاہور، اسلام آباد، پشاور سمیت ملک کے بیشترعلاقوں میں کہیں ہلکی کہیں تیز بارش کی پیشگوئی کی ہے۔
موسم کا حال بتانے والوں کا کہنا ہے کہ کشمیر، گلگت بلتستان میں بھی موسلا دھار بارش سے ندی اور نالوں میں شدید طغیانی کا خطرہ ہے۔
پی ڈی ایم اے کے مطابق کے پی میں 24 سے 48 گھنٹوں کے دوران مزید موسلا دھار بارش کا امکان ہے، سوات، چترال، ایبٹ آباد، مانسہرہ، پشاور، بنوں اور وزیرستان میں سیلاب کی صورتحال کا خدشہ ہے۔
اس کے علاوہ دریائے سوات، پنجکوڑا اور ندیوں میں پانی کی سطح میں مزید اضافہ متوقع ہے، دریائے کابل میں کم درجے کے سیلاب کی صورتحال پیدا ہونے کا قوی امکان ہے۔
پی ڈی ایم اے ترجمان کا کہنا ہے کہ پہاڑی علاقوں میں لینڈ سلائیڈنگ اور مقامی ندی نالوں میں طغیانی کا خدشہ ہے، ضلعی انتظامیہ کو پیشگی اقدامات اٹھانے کے لیے الرٹ جاری کردیا گیا ہے۔
ترجمان کے مطابق سیلابی صورتحال کو مدنظر رکھتے ہوئے مقامی انتظامیہ کو حساس مقامات اور شاہراہوں پر ٹریفک کنٹرول کے لیے اقدامات کی ہدایات دی گئی ہیں۔
مزید پڑھیں : شمالی علاقہ جات میں جھیلیں پھٹنے اور سیلاب کا خطرہ
یاد رہے کہ س سے قبل بھی این ڈی ایم اے نے شمالی علاقوں میں شدید گرمی اور مون سون بارشوں کے باعث گلیشیئر پھٹنے اور سیلاب کا انتباہ جاری کیا تھا۔
جس میں کہا گیا تھا کہ شدید گرمی اور مون سون بارشوں سے گلیشیئر پھٹنے کا خطرہ بڑھ گیا ہے، گلیشیئر پھٹنے کے باعث سڑکوں اور پلوں کو نقصان کا اندیشہ ہے۔
