کراچی : محکمہ تعلیم سندھ نے سیلاب متاثرین کی بحالی کیلئے اقدامات کرتے ہوئے بچوں کی تعلیم کا عمل جاری رکھنے کا فیصلہ کیا ہے۔
اس حوالے سے صوبہ سندھ میں سیلاب متاثرین کے ریلیف کیمپوں میں ٹینٹ اسکول قائم کرنے کا آغاز کیا جارہا ہے۔
ابتدائی طور پر وزیر تعلیم سندھ سردار شاہ نے عمرکوٹ میں پہلے ٹینٹ اسکول کا افتتاح کردیا، ان کا کہنا تھا کہ ٹینٹ اسکول میں بچوں کی تعلیم کے سلسلے کو جاری رکھا جائے گا۔
انہوں نے اس عزم کا اظہار کیا کہ سیلاب کے باعث متاثرہ بچوں کی تعلیم متاثر ہونے نہیں دینگے، اس موقع پر انہوں نے سیلاب متاثرہ بچوں کے ساتھ ٹینٹ اسکول میں کچھ وقت گزرا۔
وزیرتعلیم نے سیکریٹری تعلیم کو سندھ بھر میں قائم ریلیف کیمپوں میں اسکولز قائم کرنے کی ہدایت جاری کرتے ہوئے کہا کہ یہ اقدام نہ اٹھاتے تو 25 لاکھ بچے اسکولوں سے باہر ہو جاتے۔
وزیر تعلیم سندھ سردار شاہ نے متعلقہ ڈی سی اور ڈی ای اوز کو ٹینٹ اسکول لگانے اور ان کڑی نگرانی کرنے کا حکم بھی دیا۔
