The news is by your side.

سیلابی صورتحال سے متعلق ڈی جی میٹ کے تہلکہ خیز انکشافات

ڈائریکٹر جنرل محکمہ موسمیات صاحبزادہ خان نے سیلابی صورت حال سے متعلق تہلکہ خیز انٹرویو میں حقائق بیان کردیے۔

اے آر وائی نیوز سے خصوصی گفتگو کرتے ہوئے ڈی جی میٹ صاحبزادہ خان نے بتایا کہ محکمہ موسمیات نے تین ماہ پہلے ہی غیرمعمولی بارشوں کا الرٹ جاری کردیا تھا۔

انہوں نے کہا کہ بلوچستان سمیت ملک بھر میں مون سون بارشوں کی شدت کے حوالے سے مئی کے پہلے ہفتے میں این ڈی ایم اے، وزیراعظم آفس اور ہر پلیٹ فارم کو آگاہی فراہم کردی گئی تھی۔

ڈی جی میٹ نے بتایا کہ ہماری فورکاسٹ تھی کہ اس سال مون سون بارشیں معمول سے زیادہ ہوں گی جب اپریل میں ساؤتھ ایشین فورم میٹنگ ہوئی تھی تو ماہرین نےغیرمعمولی صورتحال سے آگاہ کیا۔

صاحبزادہ خان کا کہنا تھا کہ سیسکاف رپورٹ پر مئی کے پہلے ہفتے میں ہم نے این ڈی ایم اے اور تمام اداروں کو مطلع کیا جبکہ وزیراعظم آفس کو بھی غیرمعمولی بارشوں کا تین ماہ پہلے ہی بتادیا تھا۔

ان کا کہنا تھا کہ چیف سیکرٹریز، وزرائے اعلی، پی ڈی ایم ایز کو بھی وقت سے پہلے بتا دیا تھا جبکہ حالیہ مون سون سیزن میں سندھ اور بلوچستان زیادہ متاثر ہوئے ہیں۔

واضح رہے کہ ملک بھر میں مسلسل بارشوں کے بعد سیلاب سے ہلاکتوں کی تعداد 980 سے تجاز کرگئی ہے گزشتہ 24 گھنٹوں کے دوران سندھ میں 33، خیبر پختونخوا میں 10، پنجاب میں 2 اموات رپورٹ ہوئیں۔

Comments

یہ بھی پڑھیں