The news is by your side.

بولان: سیلابی ریلا 2 گیس پائپ لائنیں بہا لے گیا

کوئٹہ: بلوچستان کے شہر بولان میں سیلابی ریلا 2 گیس پائپ لائنیں بہا لے گیا، جس سے کئی شہروں میں گیس سپلائی معطل ہو گئی۔

تفصیلات کے مطابق بولان کی تحصیل مچھ میں بی بی نانی کے مقام پر گزشتہ روز ایک اور گیس پائپ لائن سیلابی ریلے میں بہہ گئی ہے، جس سے بیش تر علاقوں میں گیس سپلائی معطل ہو گئی۔

مچھ شہر کو گیس کی سپلائی مکمل طور پر بند ہوگئی ہے، کوئٹہ، مستونگ، قلات، پشین اور دیگر علاقوں میں بھی گیس کی سپلائی معطل ہے۔

گیس غائب ہونے سے ایل پی جی کی دکانوں پر رش بڑھ گیا، گھریلو صارفین اور ہوٹل مالکان کو گیس نہ ہونے سے مشکلات کا سامنا ہے۔

سوئی سدرن گیس حکام کا کہنا ہے کہ متاثرہ 12 انچ قطر کی پائپ لائن کی بحالی کے لیے ٹیموں کو روانہ کر دیا گیا ہے، بولان میں ٹیلی کمیونیکیشن سگنلز دستیاب نہیں ہیں، جس کی وجہ سے بحالی کے کاموں کی پیش رفت معلوم ہونے میں کچھ وقت لگے گا۔

حکام نے کہا ہے کہ صارفین ایندھن کی ضروریات پوری کرنے کے لیے متبادل انتظامات کر لیں۔

یاد رہے کہ 19 اگست کو بھی بی بی نانی کے مقام پر 24 انچ قطر کی لائن کو سیلابی ریلے سے شدید نقصان پہنچا تھا، اس پائپ لائن کی بحالی کا کام مسلسل بارش کے باعث تاحال مکمل نہیں ہو سکا ہے۔

Comments

یہ بھی پڑھیں