لاہور / پشاور / کوئٹہ : ملک کے مختلف شہروں میں آٹا مہنگا ہونے سے شہری پریشان ہیں ،،فلورملزمالکان کا کہنا ہے گندم کی ترسیل نہ ہونے پرآٹےکی قیمت بڑھ گئی، شہریوں نے انتظامیہ سے نوٹس لینے کا مطالبہ کردیا۔
تفصیلات کے مطابق لاہور ہو یا فیصل آباد، پشاور ہو یا کوئٹہ ملک کے مختلف شہروں میں آٹے کی قیمتوں میں اچانک اضافے سے شہری پریشان ہوگئے ہیں، لاہور میں بیس کلو آٹے کی قیمت 805 سے بڑھا کر 925 کردی گئی۔
تندور مالکان نے روٹی چھ روپے سے بڑھا کر آٹھ روپے کردی، فیصل آباد میں فلور ملز مالکان کا کہنا ہے سرکاری گندم نہ ملنے پر آٹے کی قیمت میں اضافہ کیا گیا۔
ایک کلو آٹا45روپے کے بجائے 65 روپے میں فروخت ہورہا ہے۔ خیبرپختونخواہ میں بھی آٹے کا بحران شدت اختیار کرگیا، فلور ملز مالکان کا کہنا ہے پنجاب سے سے آٹے کی ترسیل نہ ہونے کے برابر ہے، کوئٹہ میں بھی آٹے کی قلت بڑھنے لگی، آٹے کی قیمتوں میں اضافے کے باعث شہریوں کو مشکلات کا سامنا ہے۔
واضح رہے کہ گزشتہ برس کے آخر اور رواں برس کی ابتدا میں ملک میں آٹے کا بحران پیدا ہوگیا تھا، ملک کے بعض علاقوں میں آٹے کی قیمت 85 روپے فی کلو تک جاپہنچی تھی۔
مزید پڑھیں: آٹے کی قیمت سے متعلق بری خبر آ گئی
فلور مل مالکان نے 40 روپے کلو آٹا فراہم کرنے سے انکار کردیا تھا۔ آٹے اور چینی کی قیمتوں میں اضافے پر وزیر اعظم نے بھی حکومتی کوتاہی کا اعتراف کیا تھا۔
