ابو ظہبی: متحدہ عرب امارات کی ایئر لائن فلائی دبئی نے عید الفطر کے دوران خصوصی پیکجز کا اعلان کردیا، پیکج میں ٹکٹ کے ساتھ ہوٹل کی رہائش بھی شامل ہے۔
اردو نیوز کے مطابق متحدہ عرب امارات میں فلائی دبئی نے عید الفطر کی تعطیلات کے دوران منتخب شہروں کے لیے خصوصی پیکج جاری کیے ہیں۔
فلائی دبئی کا کہنا ہے کہ 15 سے 23 اپریل 2023 کے دوران منتخب مقامات کے لیے ریٹرن ٹکٹ کے ساتھ 3 دن ہوٹل میں قیام کا پیکج دیا جارہا ہے۔
آذر بائیجان کے دارالحکومت باکو کے لیے 22 سو 29 درہم سے پیکج شروع ہوگا، سری لنکا کے دارالحکومت کولمبو کے لیے ابتدائی پیکج 27 سو 49 درہم کا ہے۔
فلائی دبئی کا مزید کہنا ہے کہ تھائی لینڈ کے شہر کرابی کے لیے 26 سو 49 درہم کا پیکج ہے، جزائر مالدیپ کے لیے 54 سو 79 درہم، آرمینیا کے دارالحکومت کے لیے 22 سو 29 درہم کا پیکج دستیاب ہے۔
ایئر لائن کی ویب سائٹ پر عید الفطر تعطیلات پیکج کی مزید تفصیلات دی گئی ہیں جن میں ٹکٹ کے علاوہ ہوٹل میں قیام، آمد و رفت اور رینٹ اے کار وغیرہ شامل ہیں۔
