ایئرلائن فلائی دبئی نے عالمی وبا کی پابندیاں ختم اور فضائی سفر بحال ہونے کے بعد ریکارڈ منافعے کا اعلان کیا ہے۔
امریکی خبر رساں ایجنسی اے پی کے مطابق متحدہ عرب امارات میں سیاحت اور کاروبار کے مرکز دبئی کی کمپنی نے سنہ 2022 میں 32 کروڑ 70 لاکھ ڈالر منافع کمایا ہے۔
یہ منافع 2021 کے مقابلے میں 43 فیصد زیادہ ہے، اسی طرح کمپنی کے سالانہ ریوینیو میں 72 فیصد اضافہ ہوا اور یہ دو ارب 50 کروڑ ڈالر تک پہنچ گیا۔
فلائی دبئی کے چیف ایگزیکٹیو افسر غیث ال غیث نے ایک بیان میں کہا کہ ہم نے پہلے ہی دبئی میں بڑے مواقعے کا اندازہ لگا لیا تھا اور فضائی سفر کی طلب میں اضافے کے بعد ہم نے اپنے آپریشنز کو بڑھانے پر توجہ مرکوز کر رکھی تھی۔
فلائی دبئی کا مزید ملازمتیں دینے کا فیصلہ
انہوں نے کہا کہ گذشتہ برس دنیا کے مصروف ترین سیاحتی مرکز دبئی کے لیے فضائی سفر میں دو گنا اضافہ ہو گیا تھا، تاہم یہ کورونا وائرس کی وبا سے قبل 2019 کے ریکارڈ سے کم ہے۔
فلائی دبئی کا کہنا ہے کہ 2022 میں ایک کروڑ 6 لاکھ مسافروں کو منزل تک پہنچایا اور یہ تعداد گذشتہ برس کی نسبت 89 فیصد زیادہ ہے۔
کمپنی کے مطابق فلائی دبئی نے اپنی صلاحیت میں بھی اضافہ کیا ہے اور 17 نئے جہاز خریدنے کے ساتھ 1300 نئے ملازمین بھی بھرتی کیے ہیں۔
کمپنی کے ایک بیان میں کہا گیا ہے کہ گذشتہ برس اچھی کارکردگی کی وجہ سے قطر میں فیفا فٹ بال ورلڈ کپ کے دوران فلائی دبئی کی جانب سے 1300 کے قریب شٹل فلائٹس چلائی گئیں جس میں 1 لاکھ 33 ہزار شائقین نے سفر کیا۔
یاد رہے کہ 2020 میں فلائی دبئی کو 19 کروڑ 40 لاکھ ڈالر کا خسارہ ہوا تھا۔
