اسلام آباد: وزیرِ خارجہ شاہ محمود قریشی نے کہا ہے کہ امریکا نے افغان جنگ شروع کی ہے جسے اب 17 سال ہو گئے ہیں، پومپیو کو فون پر یاد دلایا کہ پاکستان کی وجہ سے طالبان مذاکرات کر رہے ہیں۔
تفصیلات کے مطابق اے آر وائی کی اسپیشل ٹرانسمیشن میں بات کرتے ہوئے شاہ محمود نے کہا کہ گزشتہ روز امریکی وزیر خارجہ مائیک پومپیو کو بتایا کہ طالبان امریکا مذاکرات پاکستان کی وجہ سے ہو رہے ہیں۔
وزیر خارجہ کا کہنا تھا کہ انھوں نے میونخ کانفرنس میں بھی کہا تھا کہ افغان امن عمل میں بھارت رخنہ ڈال سکتا ہے، مودی نے الیکشن کی سیاست میں پورے خطے کو داؤ پر لگا دیا ہے۔
[bs-quote quote=”وزیر خارجہ سے سعودی ہم منصب کا رابطہ، دونوں رہنماؤں کے درمیان او آئی سی اجلاس سے متعلق تبادلہ خیال کیا گیا۔” style=”style-8″ align=”left”][/bs-quote]
دریں اثنا اسپیشل ٹرانسمیشن کے دوران وزیر خارجہ شاہ محمود کو سعودی ہم منصب کا فون آیا، انھوں نے کہا کہ سعودی وزیر خارجہ کا فون آیا ہے اس لیے پروگرام میں مزید گفتگو نہیں کر سکتا۔
وزیر خارجہ شاہ محمود قریشی سے سعودی ہم منصب کے رابطے میں دونوں رہنماؤں کے درمیان او آئی سی اجلاس سے متعلق تبادلہ خیال کیا گیا۔
قبل ازیں، وزیرِ خارجہ شاہ محمود قریشی کی زیر صدارت خصوصی مشاورتی اجلاس میں سیکرٹری خارجہ تہمینہ جنجوعہ، وزارت خارجہ کے سینئرحکام، سابق سفیروں نے شرکت کی، جس میں پاک بھارت کشیدگی اور خطے میں امن و امان کی صورت حال پر مشاورت کی گئی۔
اجلاس میں خطے میں قیام امن کے لیے اہم ممالک کی سیاسی قیادت سے روابط کے مزید فروغ کا فیصلہ کیا گیا، شاہ محمود نے کہا کہ سیاسی مقاصد کے لیے بھارتی جارحیت خطے کے امن کو متاثر کر سکتی ہے۔
ان کا کہنا تھا کہ وزیر اعظم نے آج بھی بھارت کو قیام امن کے لیے مذاکرات کی دعوت دی، ہم سفارتی سطح پر قیام امن کے لیے اپنی کاوشیں جاری رکھیں گے۔
