The news is by your side.

Advertisement

وزیر خارجہ 3 روزہ دورے پر تاجکستان پہنچ گئے

اسلام آباد: وزیر خارجہ شاہ محمود قریشی وفد کے ہمراہ 3 روزہ دورے پر تاجکستان کے دارالحکومت دوشنبہ پہنچ گئے۔

تفصیلات کے مطابق شاہ محمود تاجکستان پہنچ گئے، دوشنبہ ایئر پورٹ پر تاجکستان کے نائب وزیر خارجہ حسین زادہ مظفر، تاجکستان میں پاکستان کے سفیر عمران حیدر، نائب سفیر شاہد علی سہیڑ اور پاکستانی سفارت خانے کے اعلیٰ حکام نے وزیر خارجہ کا پرتپاک خیر مقدم کیا۔

وزیر خارجہ کل وفد کی قیادت کرتے ہوئے تاجکستان کے دارالحکومت دوشنبہ میں منعقدہ ’نویں ہارٹ آف ایشیا – استنبول پراسیس‘ کانفرنس میں شرکت کریں گے، اس کانفرنس کا عنوان ’امن و ترقی کے لیے اتفاق رائے کو مضبوط بنانا‘ ہے۔

وزیر خارجہ شاہ محمود قریشی وزارتی کانفرنس سے خصوصی خطاب بھی کریں گے، جس میں وہ افغان عمل میں پاکستان کی مثبت کاوشوں، افغانستان کی ترقی اور روابط کے لیے حمایت کو اجاگر کریں گے۔

وزیر خارجہ، ہارٹ آف ایشیا کانفرنس میں شرکت کے ساتھ ساتھ اپنے تاجک ہم منصب سراج الدین مہرالدین و تاجک اعلیٰ قیادت سے بھی ملاقاتیں کریں گے۔

ان ملاقاتوں میں دو طرفہ تعلقات، کثیرالجہتی شعبہ جات میں دو طرفہ تعاون کے فروغ سمیت باہمی دل چسپی کے امور پر تبادلہ خیال کیا جائے گا۔

وزیر خارجہ کی دوشنبے کانفرنس میں شریک کلیدی ممالک کے وزرائے خارجہ کے ساتھ دو طرفہ ملاقاتیں بھی شیڈول کا حصہ ہیں، توقع ہے کہ وزیر خارجہ کا دورہ تاجکستان دونوں ممالک کے مابین دیرینہ برادرانہ تعلقات کو مزید مستحکم کرنے میں معاون ثابت ہوگا۔

Comments

یہ بھی پڑھیں