اسلام آباد: وزیر خارجہ شاہ محمود قریشی ایران کا دورہ مکمل کر کے سعودی عرب روانہ ہو گئے ہیں۔
تفصیلات کے مطابق وزیر خارجہ ایران کا دورہ مکمل کر کے سعودی عرب روانہ ہو گئے، مہر آباد ایئر پورٹ پر ایرانی حکام اور پاکستانی سفارت خانے کے عملے نے انھیں رخصت کیا۔
وزیر خارجہ شاہ محمود ریاض میں سعودی ہم منصب سے ملاقات کریں گے، جس میں خطے میں امن کی صورت حال کے حوالے سے تفصیلی تبادلۂ خیال ہوگا۔
خیال رہے کہ وزیر اعظم کی ہدایت پر وزیر خارجہ نے 12 اور 13 جنوری کو ایران کا دورہ کیا، ترجمان دفتر خارجہ عائشہ فاروقی نے مشرق وسطی کی کشیدہ صورت حال کے پیش نظر وزیر خارجہ کے دورۂ ایران کے حوالے سے کہا کہ اس دورے کا مقصد خطے میں کشیدگی میں کمی لانا اور سفارتی ذرایع سے مدد فراہم کرنا تھا۔
پاکستانی سرزمین کسی جنگ کیلئے استعمال نہیں ہوگی، وزیرخارجہ
ترجمان کا کہنا تھا کہ وزیر خارجہ نے ایرانی صدر حسن روحانی اور وزیر خارجہ جواد ظریف سے ملاقاتیں کیں، پاکستان کشیدگی میں کمی کی ایرانی ترجیح کو سراہتا ہے، امید ہے ایران درپیش صورت حال سے روایتی دانش مندی سے نبرد آزما ہوگا، وزیر خارجہ نے مسئلہ کشمیر پر ایران کی بھرپور حمایت پر بھی شکریہ ادا کیا۔
ملاقاتوں میں وزیر خارجہ کا خطے میں کشیدگی کم کرنے کے لیے سفارتی ذرایع سے حل کرنے پر زور دیتے ہوئے کہنا تھا کہ پاکستان خطے میں کسی جنگ کا حصہ نہیں بنے گا، خطے میں امن کے لیے پاکستان مثبت کردار ادا کرنے کے لیے پر عزم ہے۔
