اسلام آباد: پاکستان نے افغانستان سے دہشت گرد تنظیموں کے خلاف کارروائی کا مطالبہ کردیا۔
تفصیلات کے مطابق میڈیا بریفنگ میں ترجمان دفترخارجہ نفیس زکریا نے کہا کہ اے پی ایس پشاور سمیت متعدد دہشت گردحملوں کی منصوبہ بندی افغانستان میں ہوئی۔
انہوں نے کہا کہ جماعت الاحرار صرف افغانستان میں موجود ہے۔ افغانستان ہماری تشویش دورکرے۔ جماعت الاحرار سمیت دہشت گرد تنظیموں کے خلاف کارروائی کرے۔ جو تعاون درکار ہوگا فراہم کریں گے۔
ترجمان دفتر خارجہ نے مزید کہا کہ بھارت ایل او سی پر جان بوجھ کر شہریوں کو نشانہ بنا رہا ہے۔ پاکستان نے بارہا بھارت کے ساتھ احتجاج ریکارڈ کروایا ہے۔ اقوام متحدہ کا مبصر مشن ذمہ داریاں پوری طرح ادا کرے۔
اس سے قبل سیکریٹری خارجہ اعزاز چوہدری نے اسلام آباد یونیورسٹی میں تقریب سے خطاب میں کہا کہ داعش کے لوگ افغانستان میں جمع ہو چکے ہیں جو پاکستان بھی آسکتے ہیں۔
انہوں نے کہا کہ پاکستان کو ان سے خطرہ ہے۔ داعش سے منسلک افراد افغانستان میں پاکستان کے قریبی علاقوں میں ہیں۔ ہمیں بارڈر مینجمنٹ کی ضرورت ہے۔
