اسلام آباد: ترجمان دفتر خارجہ ڈاکٹر محمد فیصل کا کہنا ہے کہ آج بھارتی جاسوس حامد نہال انصاری کو بھارت کے حوالے کر دیا جائے گا، بھارتی جاسوس کو کل رہا کیا گیا تھا۔
تفصیلات کے مطابق ترجمان دفتر خارجہ ڈاکٹر محمد فیصل کا کہنا ہے کہ آج بھارتی جاسوس حامد نہال انصاری کو 1 سے 3 بجے کے درمیان واہگہ بارڈر پر بھارت کے حوالے کر دیا جائے گا۔
ترجمان کا کہنا ہے کہ بھارتی جاسوس حامد نہال انصاری کو پاکستان نے رہا کر دیا ہے۔
خیال رہے کہ 3 سال قبل ملٹری کورٹ سے سزا پانے والے بھارتی جاسوس حامد نہال کو سزا مکمل ہونے پر رہا کیا گیا ہے، مجرم کو ریاست مخالفت سرگرمیوں پر گرفتار کیا گیا تھا۔
مجرم نے گرفتاری کے بعد اعتراف کیا تھا کہ وہ افغانستان کے راستے پاکستان میں داخل ہوا تھا۔ وہ 7 فیس بک اکاؤنٹس اور 30 سے زائد ای میل آئی ڈیز استعمال کرتا رہا تھا۔
مجرم کو کوہاٹ میں ملٹری عدالت سے سزا سنائی گئی تھی جس کے بعد اسے پشاور کی سینٹرل جیل منتقل کردیا گیا۔ اسے جعلسازی اور ریاست کے خلاف اقدامات کرنے کے جرم میں سزا سنائی گئی تھی۔
