اسلام آباد : ترجمان دفتر خارجہ کا کہنا ہے کہ جعفر ایکسپریس پر حملے کے دوران افغانستان سے رابطوں کا سراغ ملا ، حملہ بیرون ملک بیٹھی قیادت نے کرایا۔
تفصیلات کے مطابق ترجمان دفترخارجہ شفقت علی خان نے ہفتہ وار میڈیا بریفنگ دیتے ہوئے کہا کہ پاکستان اپنی سرحدوں کے باہر سے پلان کی جانے والی دہشت گردی کا شکار ہے، جعفر ایکسپریس پر حملہ بھی بیرون ملک بیٹھی قیادت نے کروایا،افغان عبوری حکومت سےمطالبہ کیا دہشت گرد گروہوں کواپنی سرزمین استعمال کرنے سے روکے۔
ترجمان کا کہنا تھا کہ پاکستان دہشت گردی کے حوالے سے ثبوت افغان حکام سےشیئر کرتا رہا ہے، جعفرایکسپریس حملہ انتہائی سنگین تھا، ابھی صرف ریسکیو آپریشن مکمل ہوا ہے۔
انھوں نے کہا کہ پاکستانی حکومت کثیرالجہتی حکمت عملی پر گامزن ہے، افغانستان پرہماری بنیادی ترجیح دوستانہ وقریبی تعلقات کا فروغ ہے، بہت سے دوست ممالک نے جعفرایکسپریس دہشت گردی کی مذمت کی ہے۔
شفقت علی خان کا مزید کہنا تھا کہ ہماری پالیسی میں کوئی تبدیلی نہیں آئی، جعفرایکسپریس واقعہ کے دوران ٹریس شدہ کالز میں افغانستان سے رابطوں کا سراغ ملا ہے۔
پاکستان پر سفری پابندی کے حوالے سے انھوں نے بتایا کہ امریکا میں پاکستانی شہریوں کے داخلے پر پابندی کی باتیں قیاس آرائیاں ہیں۔
ترجمان کا کہنا تھا کہ پاکستان امریکاسے رابطے میں ہے، وزارت خارجہ اور امریکا میں ہمارا سفارتخانہ امریکی حکام کے ساتھ رابطے میں ہے، سفری پابندی کے حوالے سے اب تک ایسی کوئی معلومات نہیں دی گئی۔
