اسلام آباد: دفتر خارجہ نے افغان دارالحکومت کابل میں سفارت خانہ پر حملے کے بعد اسے بند کرنے یا عملہ واپس بلانے کی خبروں کو غلط قرار دے دیا۔
ترجمان دفتر خارجہ ممتاز زہرا بلوچ نے اپنے جاری کردہ بیان میں بتایا کہ کابل میں سفارت خانہ بند نہیں کیا جا رہا، سفارتی عملے کو بھی واپس نہیں بلا رہے، عملے کی سکیورٹی سے متعلق افغانستان حکومت سے رابطے میں ہیں۔
ممتاز زہرا بلوچ نے کہا کہ کابل میں ہیڈ آف مشن پر آج حملہ کیا گیا جس میں سکیورٹی گارڈ زخمی ہوا، افغان ناظم الامور کو دفتر خارجہ میں طلب کر کے واقعے پر شدید احتجاج اور اس کی فوری تحقیقات کا مطالبہ کیا گیا۔
ترجمان نے بتایا کہ افغان حکام نے سکیورٹی یقینی بنانے کی یقین دہانی کرائی، کابل میں سفارت خانے کی سکیورٹی کو بہتر بنایا گیا ہے جبکہ دیگر سفارتی مشنز کی سکیورٹی بھی سخت کر دی گئی۔
ان کا کہنا تھا کہ افغان عبوری حکومت کے وزیر خارجہ نے ہمارے ناظم الامور سے بات کی ہے، افغان وزیر خارجہ نے ذمہ داروں کو فوری گرفتار کرنے کی یقین دہانی کرائی ہے، انہوں نے سکیورٹی بہتر بنانے کی بھی یقین دہانی کرائی ہے۔
