ملک کے مختلف علاقوں میں شدید دھند کے باعث موٹر ویز کو مختلف مقامات پر بند کردیا گیا ہے۔
اے آر وائی نیوز کے مطابق ترجمان موٹر وے پولیس کا کہنا ہے کہ موٹروے ایم 1 پشاور سے اسلام آباد تک دھند کے باعث بند ہے۔ سوات ایکسپریس وے کو کرنل شیرخان سے چکدرہ تک دھند کے باعث بند کردیا گیا ہے۔
ترجمان کے مطابق ہزارہ ایکسپریس وے برہان سے شاہ مقصود تک دھند کے باعث بند ہے، موٹروے ایم 2 اسلام آباد سے نیلا دلہا تک دھند کے باعث بند ہے۔
ایم 14 ہکلہ سے یارک تک شدید دھند کی وجہ سے ٹریفک کے لیے بند کر دی گئی، اس کے علاوہ ایم 2 لاہور سے شیخوپورہ تک دھند کی وجہ سے بند کردی گئی ہے۔
موٹر وے پولیس کے مطابق موٹروے ایم 3 فیض پور سے درخانہ تک دھند کے باعث بند ہے۔ لاہور سیالکوٹ موٹروے دھند کی وجہ سے بند کر دیا گیا۔
موٹروے ایم 4 ملتان سے پنڈی بھٹیاں تک دھندکی وجہ سے بند کردی گئی ہے، جبکہ قومی شاہراؤں پر دھند کا دورانیہ موسم سرد ہونے سے بڑھ گیا ہے۔
ترجمان موٹروے پولیس کے مطابق موٹروے بند کرنے کا مقصد حادثات سے بچاؤ اور موٹروے استعمال کرنے والوں کے جان و مال کا تحفظ ہے، شہریوں سے درخواست ہے کہ دھند کہ اوقات میں غیر ضروری سفر سے گریز کریں۔
اپنا سفر دن کی روشنی میں مکمل کر کے دھند کے آغاز سے پہلے اپنے منزل مقصود تک پہنچ جائیں – گاڑیوں میں فوگ لائٹس کا استعمال کریں، تیز رفتاری سے گریز کریں اور اگلی گاڑی سے مناسب فاصلہ معمول سے زیادہ رکھیں۔
پاکستان سے متعلق کینیڈین حکومت کی سفری ہدایات جاری
ترجمان موٹروے پولیس نے کہا کہ سفر شروع کرنے سے پہلے موٹروے پولیس ہیلپ لائن 130 یا نیشنل ہائی ویز اینڈ موٹروے پولیس کے آفیشل سوشل میڈیا اکاؤنٹ سے بھی تازہ ترین معلومات ضرور حاصل کر لیں۔
