کراچی: شدید دھند کے باعث لاہور سے فضائی سفر کرنے والے مسافروں کو ہدایت کی گئی ہے کہ وہ سڑک کے ذریعے اسلام آباد ایئرپورٹ پہنچیں، جہاں سے ان کی شیڈول پروازیں اڑان بھریں گی۔
تفصیلات کے مطابق پنچاب میں موسم کی خرابی، لاہور اور ملتان ایئر پورٹ پر دھند کی صورت حال کی وجہ سے فضائی آپریشن متاثر ہو چکا ہے، جس کے سبب لاہور سے مسافروں کو براستہ سڑک اسلام آباد پہنچنے کی اطلاع دے دی گئی ہے۔
رپورٹ کے مطابق شدید دھند کی وجہ سے دمام، مدینہ، جدہ اور ابوظبی سے آنے والی پروازوں کو لاہور اترنے کی اجازت نہیں دی گئی، اس لیے بیرونی ممالک سے لاہور آنے والی 4 پروازوں کو اسلام آباد اتار دیا گیا ہے۔
دوسری طرف لاہور سے اندرون و بیرون جانے والی 5 پروازوں کو اسلام آباد منتقل کر دیا گیا ہے، یہ پانچوں پروازیں اب لاہور کی بجائے اسلام آباد سے روانہ ہوں گی۔
استنبول، ابوظبی، مدینہ، کوئٹہ اور جدہ کی پرواز کی روانگی کا مقام لاہور سے اسلام آباد منتقل کیا گیا ہے۔
لاہور سے تاخیر کا شکار پروازوں میں اتحاد ای وائے 242 لاہور۔ ابوظبی، سیرین ای ار 821 لاہور- جدہ، سعودی ایئرلائنز ایس وی 735 لاہور- جدہ شامل ہیں۔ ڈائیورٹڈ پروازوں میں پی کے 322 لاہور- کوئٹہ، پی کے 760 لاہور- جدہ شامل ہیں۔ فیصل آباد سے اسلام آباد کی طرف موڑی گئی پروازوں میں پی کے 248 (پی آئی اے) دمام سے لاہور، پی کے 224 دبئی سے فیصل آباد، پی کے 716 مدینہ سے لاہور براستہ کراچی، پی کے 244 دمام سے سیالکوٹ شامل ہیں۔
