لاہور: پنجاب کے مختلف علاقوں میں شدید دھند کے باعث موٹر وے کو متعدد مقامات پر آمدورفت کے لئے بند کردیا گیا ہے، شدید دھند کے باعث اسلام آباد انٹرنیشنل ایئرپورٹ پر پروازوں کاشیڈول بھی متاثر ہوگیا۔
اے آر وائی نیوز کے مطابق موٹروے ایم 1 پشاور سے برہان تک دھند کے باعث بند ہے، جبکہ موٹروے ایم 2 لاہور سے کوٹ مومن تک دھند کے باعث بند کردی گئی ہے۔
موٹروے ایم 3، موٹروے ایم 5 شیر شاہ سے ظاہر پیر تک شدید دھند کی وجہ سے بند کردی گئی ہے۔ اس کے علاوہ موٹروے ایم 4 بھی دھند کے باعث بند ہے۔
لاہور سیالکوٹ موٹروے دھند کے باعث بند کردی گئی جبکہ موٹروے ایم 14 کھڑپہ تا عیسیٰ خیل دھندکی وجہ سے بند ہے، سوات ایکسپریس وے کرنل شیرخان سے اسماعیلہ تک دھند کے باعث بند ہے۔
ترجمان موٹروے پولیس کے مطابق موٹروے بند کرنے کا مقصد حادثات سے بچاؤ اور موٹروے استعمال کرنے والوں کے جان و مال کا تحفظ ہے، شہریوں سے درخواست ہے کہ دھند کہ اوقات میں غیر ضروری سفر سے گریز کریں۔
اپنا سفر دن کی روشنی میں مکمل کر کے دھند کے آغاز سے پہلے اپنے منزل مقصود تک پہنچ جائیں – گاڑیوں میں فوگ لائٹس کا استعمال کریں، تیز رفتاری سے گریز کریں اور اگلی گاڑی سے مناسب فاصلہ معمول سے زیادہ رکھیں۔
پنجاب کی فضاؤں میں چھائی دھند زندگیاں نگلنے لگی، 4 افراد جاں بحق، 37 زخمی
ترجمان موٹروے پولیس کا کہنا ہے کہ سفر شروع کرنے سے پہلے موٹروے پولیس ہیلپ لائن 130 یا نیشنل ہائی ویز اینڈ موٹروے پولیس کے آفیشل سوشل میڈیا اکاؤنٹ سے بھی تازہ ترین معلومات ضرور حاصل کرلیں۔
