دالوں کے خاندان سے تعلق رکھنے والی ایک غذائی جنس "چنا” ہے جس کی دو عام اقسام کالا چنا اور سفید چنا ہیں۔
چنا وٹامن اور معدنیات سے بھرپور غذائی جنس ہے جو پاکستان اور بھارت جیسے ملکوں میں عام ہے اور کثیر تعداد میں پیدا ہوتا ہے۔ اسے دالوں کے خاندان کا ہیرو کہہ سکتے ہیں جس میں فولاد، وٹامن بی 6، میگنیشیم، پوٹاشیم اور کیلشیم کی خاصی مقدار پائی جاتی ہے اور فاسفورس، تانبا اور میگنیز بھی ہوتا ہے۔
یہ وزن کم کرنے میں مددگار ہے۔ چنے سے فائبر اور پروٹین کی کثیر مقدار جسم میں پہنچتی ہے، اور عموماً ایک عام پیالہ بھر کر کھانے سے شکم سیری ہوجاتی ہے اور بار بار بھوک نہیں لگتی۔ فائبر ہمارے نظام ہضم کے لیے بھی مفید ثابت ہوتا ہے۔ یہ جسم میں کولیسٹرول کو کم کرتا ہے۔
چنے میں موجود قدرتی اجزا انسانی جسم کی توانائی میں اضافہ کرتے ہیں اور چنا خاص طور پر بچوں کو ان کی بڑھتی ہوئی عمر میں غذائیت فراہم کرتا ہے۔
چنوں کو کئی ماہ تک محفوظ رکھا جاسکتا ہے اور انھیں بھگونے کے بعد استعمال کرنے سے جلد ہضم ہوجاتے ہیں۔
