اکثر افراد کھانا کھاتے ہوئے اس الجھن میں مبتلا رہتے ہیں کہ ان کی پلیٹ میں موجود اشیا آپس میں مکس نہ ہوں، ایسے افراد مختلف اشیا کے مکس ہوجانے کی صورت میں الجھن اور کراہیت کا شکار ہوجاتے ہیں اور کھانا ادھورا چھوڑ دیتے ہیں۔
تاہم ایسے افراد کے لیے ایسی شے تیار کرلی گئی جس کی مدد سے وہ صفائی اور بغیر کسی الجھن کے اپنا کھانا کھاسکتے ہیں۔
یہ شے ’فوڈ کبی‘ نامی ڈیوائڈرز ہیں جو پلیٹ کو حصوں میں تقسیم کردیتے ہیں جس کے بعد پلیٹ میں موجود مختلف اشیا اپنی جگہ پر ہی رہتی ہیں اور آپس میں مکس نہیں ہوتیں۔
سیلیکون سے بنے ہوئے یہ ڈیوائڈرز صحت کے لیے مضر بھی نہیں۔ اسے بنانے والی کمپنی کا کہنا ہے کہ ماہرین جسم کو درکار غذائیت کے حصول کے لیے غذا کی جتنی مقدار (پورشنز) پر زور دیتے ہیں، یہ ڈیوائڈرز اتنی ہی غذا لینے میں مدد کرتے ہیں۔
ماہرین کے مطابق یہ ڈیوائڈرز اوبسیسو کمپلسو ڈس آرڈر (او سی ڈی) کا شکار افراد کے لیے بھی نعمت ثابت ہوں گے جو نفاست سے کھانا چاہتے ہیں۔ اس بیماری کا شکار افراد جنون کی حد تک صفائی پسند ہوتے ہیں اور ہر شے کو پرفیکٹ دیکھنا چاہتے ہیں۔
دو رنگوں میں دستیاب یہ ڈیوائڈرز بچوں کے کھانے کو بھی دلچسپ بنا سکتے ہیں جو ان کی موجودگی میں کھانے کو کھیل سمجھنے لگیں گے۔
کیا آپ ان ڈیوائڈرز کو اپنے کچن میں رکھنا چاہتے ہیں؟
