کراچی: سندھ حکومت نے بزنس کمیونٹی کی سہولت کے لیے تھرڈ پارٹی کے ذریعے فوڈ لائسنس جاری کرنے کا فیصلہ کیا ہے۔
تفصیلات کے مطابق وزیر خوراک جام خان شورو کی زیر صدارت سندھ فوڈ اتھارٹی کے نویں بورڈ کا اہم اجلاس آج منعقد ہوا، جس میں سندھ فوڈ اتھارٹی کے 14 سے زائد ایجنڈے پیش ہوئے، جن میں 3 سے زائد ایجنڈے باہمی مشاورت سے منظور کیے گئے، اور 7 ایجنڈوں پر کمیٹیاں بنانے کی ہدایت کی گئی۔
جام خان شورو نے کہا بزنس کمیونٹی کی سہولت کے لیے کمیٹی تشکیل دی ہے جو تھرڈ پارٹی کے ذریعے فوڈ اتھارٹی کے لائسنس جاری کرے گی، لائسنس کو آسان بنانے کے لیے تھرڈ پارٹی ہائیر کی جائے گی، انھوں نے افسران کو ہدایت کی کہ فوڈ اتھارٹی سسٹم کو آسان بنایا جائے اور بزنس کمیونٹی کو بلاوجہ تنگ نہ کیا جائے۔
سندھ فوڈ اتھارٹی کا بجٹ 200 ملین سے بڑھا کر 600 ملین کرنے کے لیے وزیر خوراک نے محکمہ خزانہ سندھ کو سمری بھیجنے کی ہدایت کی۔
