کیلیفورنیا: امریکی ریاست کیلیفورنیا میں حکومت پاکستان کی معاونت سے پاکستانی آئی ٹی مصنوعات کی نمائش ہوئی، نمائش کے بعد امریکی جریدے فوربز کا کہنا ہے کہ پاکستان کے انفارمیشن ٹیکنالوجی (آئی ٹی) سیکٹر سے امیدیں بڑھ رہی ہیں۔
تفصیلات کے مطابق امریکی جریدے فوربز میں شائع شدہ امریکی صحافی ڈیوڈ بلوم نے اپنی رپورٹ میں کہا ہے کہ پاکستان کے انفارمیشن ٹیکنالوجی (آئی ٹی) سیکٹر سے امیدیں بڑھ رہی ہیں۔
رپورٹ میں کہا گیا ہے کہ پر امن پاکستان میں آئی ٹی کا شعبہ کشش کا سامان پیدا کر سکتا ہے، پاکستان نے آئی ٹی شعبے کو امریکی کمپنیز اور سرمایہ کاروں میں بھی متعارف کروانا شروع کردیا ہے۔
رپورٹ میں کہا گیا کہ آئی ٹی سیکٹر میں عالمی سودے پاکستان کی معیشت کو سہارا دے سکتے ہیں۔
رپورٹ میں بتایا گیا کہ سان ہوز، کیلی فورنیا میں پاکستانی آئی ٹی مصنوعات کی ایک روزہ نمائش ہوئی، نمائش میں حکومت پاکستان کی معاونت شامل تھی۔
نمائش میں پاکستانی سفیر اسد مجید خان نے خطاب کرتے ہوئے کہا کہ پاکستان میں آئی ٹی کا شعبہ بہترین کارکردگی دکھا رہا ہے، سلیکون ویلی کو بتانا چاہتے ہیں پاکستان آئی ٹی شعبے میں کیا کچھ کر سکتا ہے۔
اسد مجید نے کہا کہ پاکستانی اسٹالز میں شرکا کو مائیکرو الیکٹرانکس، سافٹ ویئر ڈویلپمنٹ اور مصنوعی ذہانت سے آگاہ کیا گیا۔ میڈیکل شعبے میں جدت اور کیپٹل وینچر پر بھی شرکا کو معلومات دی گئیں۔
انہوں نے کہا کہ معیشت وزیر اعظم عمران خان کی پہلی ترجیح ہے، پاکستان اس وقت آئی ٹی ایکسپورٹس کے ذریعے 4 ارب ڈالر کما رہا ہے۔
