The news is by your side.

Advertisement

غیرملکی شہری کو قتل کرنے والے 3ملزمان گرفتار، اہم انکشافات

کراچی : پولیس نے غیرملکی کے قتل اور چوری میں ملوث ملزمان کو گرفتار کرلیا، پسند کی شادی کرنے والے جوڑے پر فائرنگ کے واقعے کا مقدمہ درج کرلیا گیا۔

تفصیلات کے مطابق کراچی کے علاقے محمودآباد میں پولیس نے کامیاب کارروائی کرتے ہوئے جنوبی کوریا کے شہری کے قتل میں ملوث 3ملزمان کو گرفتارکرلیا۔

کراچی : ملزمان نے دوران تفتیش پولیس کو بیان دیا کہ وہ تینوں رات گئے قیمتی سامان چوری کرنے کی نیت سے مقتول کے مکان میں داخل ہوئے تھے۔

پولیس نے میڈیا کو بتایا کہ دوران واردات جنوبی کوریا کے شہری کی آنکھ کھلی تو اسے قتل کردیا گیا، مقتول چونگ ڈائیوان ملزمان کو پہچانتا تھا جس کے خوف سے ملزمان نے قتل کیا۔

پولیس کے مطابق ملزمان کا ایک ساتھی مقتول کے گھر کے قریب ہی رہائش پذیر تھا، ملزمان کے قبضے سے لوٹے گئے موبائل فون، پرس اور نقدی برآمد کرلیا گیا ہے۔

دریں اثناء دہلی کالونی میں ایک مکان سے عمر رسیدہ شخص کی3روز پرانی لاش ملی ہے، جسے ریسکیو ٹیم نے تحویل میں لے کر مزید کارروائی کیلئے اسپتال منتقل کردیا ہے۔

علاوہ ازیں کراچی کے علاقے شارع فیصل پر پسند کی شادی کرنے والے جوڑے پر فائرنگ کا واقعہ پیش آیا ہے ، اس حوالے سے فیروز آباد پولیس نے چھ ملزمان کیخلاف مقدمہ درج کرلیا ہے جس میں قتل، اقدام قتل کی دفعات شامل کی گئی ہیں۔

کار پر کی جانے والی اندھا دھند فائرنگ سے وسیم نامی شخص موقع پر ہی جاں بحق ہوگیا جبکہ اس کی اہلیہ سمیت 3افراد زخمی ہوئے تھے۔

پولیس حکام کا کہنا ہے کہ مقتول وسیم اہلیہ اور اپنے بھائی کے ساتھ عدالت میں پیشی کے بعد واپس گھر جارہا تھا کہ گھات لگائے ملزمان نے ان پر فآئرنگ کردی۔

پولیس کے مطابق درج کی گئی قتل کی ایف آئی آر میں ملزمان عبدالعزیز، عظیم، حمید، امین اور دیگر دو نامعلوم افراد کو نامزد کیا گیا ہے۔

Comments

یہ بھی پڑھیں