اسلام آباد: غیر ملکی کرنسی کی اسمگلنگ میں ملوث گرفتار عناصر کو قرار واقعی سزائیں دلوانے کے لیے ایف آئی اے نے عزم کا اظہار کیا ہے۔
تفصیلات کے مطابق ترجمان ایف آئی اے کا کہنا ہے کہ حوالہ ہنڈی اور غیر قانونی کرنسی ایکسچینج میں ملوث عناصر کے خلاف کریک ڈاؤن میں 652 ملزمان کو گرفتار کیا جا چکا ہے، جنھیں ٹھوس شواہد کی روشنی میں سزائیں دلوائی جائیں گی۔
رواں سال کے دوران حوالہ ہنڈی اور کرنسی کی غیر قانونی ایکسچینج میں ملوث عناصر کے خلاف 452 چھاپا مار کارروائیاں کی گئیں، جن میں 652 ملزمان کو گرفتار کر کے 453 مقدمات درج کیے گئے، اور 56 انکوائریوں کی تفتیش مکمل کی گئی۔
رواں سال کے دوران کے پی زون نے 308، لاہور زون نے 73، گوجرانوالہ زون نے 24، فیصل آباد زون نے 55، ملتان زون نے 50 ملزمان کو گرفتار کیا، اسلام آباد زون نے 26، کراچی زون نے 69، حیدرآباد زون نے 27 اور بلوچستان زون نے 20 ملزمان کو گرفتار کیا، یہ ملزمان بغیر لائسنس کرنسی کی ایکسچینج میں ملوث تھے۔
ایف آئی اے کے مطابق رواں سال چھاپوں کے دوران مجموعی طور پر 4 ارب 19 کروڑ روپے سے زائد مالیت کی ملکی و غیر ملکی کرنسی برآمد کی گئی، جس میں 7 لاکھ 46 ہزار 184 امریکی ڈالر، 35 کروڑ روپے سے زائد مالیت کی دیگر غیر ملکی کرنسی اور 3 ارب 62 کروڑ سے زائد پاکستانی روپے شامل ہیں۔
ملک گیر چھاپوں کے دوران 28 سے زائد پلازوں/مارکیٹوں/ دکانوں کو بھی سیل کیا گیا، ملزمان کی گرفتاری کے لیے قانون نافذ کرنے والے اداروں کی معاونت بھی حاصل کی گئی، اور ڈائریکٹر جنرل محسن حسن بٹ کی ہدایت کی روشنی میں دیگر ملزمان کی گرفتاری کے لیے تمام تر وسائل کو بروئے کار لایا جا رہا ہے، غیر قانونی کرنسی کی خرید و فروخت میں ملوث بین الاقوامی ایجنٹوں کے خلاف بھی گھیرا تنگ کیا جائے گا۔
