کراچی : کراچی سمیت تین شہروں میں غیر ملکی فوڈ چین کی شاپس پر حملے ہوئے ، مشتعل افراد نے پتھراؤ کرتے ہوئے شیشے توڑ دیے۔
تفصیلات کے مطابق پاکستان میں غیرملکی فوڈ چین پر حملوں کا سلسلہ جاری ہے ، کراچی سمیت تین شہروں میں غیر ملکی فوڈ چین کی شاپس پر حملے کیے گئے۔
کراچی گڈاپ میں غیر ملکی فوڈ چین شاپ پر مشتعل افراد نے دھاوا بولا تاہم پولیس کی بھاری نفری نے مشتعل افراد پر لاٹھی چارج کر کے مظاہرین کو منتشر کر دیا۔
پولیس کا کہنا تھا کہ شام6 بجے متعدد افراد فوڈ شاپ پراحتجاج کے لئے آئے، پولیس اسٹیشن ساتھ ہی ہونے کے باعث اہلکار بروقت پہنچے اور بروقت کارروائی کر کے 9 افراد کو حراست میں لیا گیا۔
مزید پڑھیں : کراچی ڈیفنس میں غیرملکی فوڈچین پر مشتعل افراد کا حملہ
ایس ایس پی ملیر کے ترجمان نے کہا کہ گڈاپ میں غیرملکی فوڈ چین فرنچائز پر شرپسندوں کے حملے کی کوشش کو ناکام بنایا، ایس ایس پی ملیر کاشف آفتاب کی زیر نگرانی شر پسند عناصر کے خلاف آپریشن کیا گیا اور شرپسند عناصرکی سپر ہائی وے روڈ بلاک کرنے کی کوشش کو بھی ناکام بنایا۔
دوسری جانب لاہور ڈیفنس فیز سکس میں مشتعل ہجوم نے غیر ملکی ریسٹورنٹ پر حملہ کیا۔
فلسطین میں مسلمانوں پر بمباری اور مظالم کے نتیجے میں لاڑکانہ میں لاٹھی بردار مظاہرین نے نجی فوڈ چین فرنچائز پر اچانک پتھراؤ کرتے ہوئے شیشے توڑ دیے، مظاہرین کے پتھراؤ کے بعد فوڈ چین فرنچائز کی جانب سے کاروباری سرگرمیاں معطل کر دی گئیں۔
ایس ایس پی کا کہنا تھا کہ ملک میں چند مقامات پر بیرون ملک کی فوڈ چین فرنچائز کو نشانہ بنانے کے واقعات سامنے آئے ہیں، ہمیں اندازہ تھا جس بنا پر پولیس فوری ریسپانس کے لیے پہلے ہی سے تیار تھی۔
یاد رہے اس سے پہلےکراچی میں ڈیفنس خیابان اتحاداور بہادرآباد میں بھی غیرملکی فوڈ چین پر مشتعل افراد نے حملہ کرکے توڑپھوڑ کی تھی۔
