کراچی: اسٹیٹ بینک آف پاکستان نے رپورٹ میں کہا ہے کہ غیر ملکی کمپنیوں نے پاکستان میں سرمایہ کاری سے کہیں زیادہ ملنے والا منافع باہر منتقل کیا۔
تفصیلات کے مطابق پاکستان میں غیر ملکی کمپنیوں نے سرمایہ کاری اتنی نہیں کی جتنی ان کمپنیوں نے کاروبار سے حاصل ہونے والا منافع ڈالرز میں بیرون ملک منتقل کیا۔
اسٹیٹ بینک کی ایک دستاویز کے مطابق مالی سال 2023-24 میں غیر ملکی کمپنیوں نے 2 ارب 21 کروڑ ڈالر کا منافع پاکستان سے منتقل کیا، جب کہ اسی مالی سال میں غیر ملکی کمپنیوں میں پاکستان میں 1.5 ارب ڈالر کی سرمایہ کاری کی گئی۔
مالی سال 2022-23 کے مقابلے میں غیر ملکی کمپنیوں نے 23 گنا زیادہ منافع پاکستان سے منتقل کیا، اسٹیٹ بینک کے مطابق جون 2024 میں غیر ملکی کمپنیوں نے پاکستان سے 41 کروڑ ڈالر کا منافع باہر منتقل کیا۔
پاکستانی برآمدات میں بڑا بریک تھرو، امریکا سب سے بڑا برآمدی ملک بن گیا
دستاویز کے مطابق سب سے زیادہ منافع فنانشل بزنس کی غیر ملکی کمپنیوں نے 64 کروڑ ڈالر باہر منتقل کیے۔ اور غیر ملکی کمپنیوں کا ڈالرز میں منافع باہر منتقل کرنا 6 سال کی بلند ترین سطح پر پہنچ گیا ہے۔
