واشنگٹن: وزیرخارجہ شاہ محمود قریشی نے امریکی ہم منصب مائیک پومپیو سے ملاقات کی اس دوران امریکا ایران کشیدگی پر تفصیلی تبادلہ خیال کیا گیا۔
تفصیلات کے مطابق وزیرخارجہ شاہ محمود قریشی کی واشنگٹن میں امریکی ہم منصب مائیک پومپیو سے ملاقات ہوئی۔ شاہ محمود نے امریکی وزیرخارجہ کو دورہ ایران اور سعودی عرب سے آگاہ کیا۔
ملاقات میں شاہ محمود نے مقبوضہ کشمیر میں انسانی حقوق کی سنگین خلاف ورزیوں سے آگاہ کیا۔
مائیک پومپیو نے افغان امن عمل میں پاکستان کی مخلصانہ کاوشوں کی تعریف کی۔ دونوں رہنماؤں کے درمیان ہونی والی ملاقات میں دوطرفہ امور اور خطے کی سلامتی پر تبادلہ خیال کیا گیا۔ امریکا طالبان کو مذاکرات کی میز پر لانے کے لیے پاکستانی کاوشوں کا ایک بار پھر معترف ہوگیا۔
مشرق وسطیٰ میں نئی جنگ کے اثرات دنیا پر پڑیں گے، شاہ محمود قریشی
قبل ازیں وزیر خارجہ شاہ محمود قریشی نے امریکی ٹی وی کو دئیے گئے انٹرویو میں کہا کہ پاکستان خطے میں کشیدگی کا خاتمہ چاہتا ہے، ایرانی صدر حسن روحانی کو خطے میں کشیدگی کم کرنے کا مشورہ دیا۔
شاہ محمود قریشی کا کہنا تھا کہ ایران کے کشیدگی میں خاتمے کے لیے مثبت اشارے ملے ہیں، ایران جوہری معاہدے کی پاسداری پر بھی تیار دکھائی دیا، امریکی صدر ٹرمپ نے پاکستان سے افغان امن عمل میں تعاون کی درخواست کی تھی، افغان طالبان امریکا مذاکرات میں سہولت کاری کا کردار ادا کیا ہے۔
واضح رہے کہ وزیرخارجہ ان دنوں امریکی دورہ پر ہیں جہاں وہ اہم عہدیداروں سے ملاقاتیں کررہے ہیں۔ اس اہم دورہ کا مقصد کشمیر صورت حال سمیت دیگر اہم موضوعات پر تبادلہ خیال اور لائحہ عمل طے کرنا ہے۔
