اسلام آباد : ترجمان دفتر خارجہ عائشہ فاروقی نے کہا ہے کہ صدرٹرمپ کے دورہ بھارت کے دوران پاکستان آمد کا کوئی امکان نہیں، امریکا افغان طالبان میں امن معاہدے پر دستخط کےاعلان کا خیرمقدم کرتے ہیں۔
یہ بات ترجمان نے اپنے ایک وضاحتی بیان میں کہی۔ تفصیلات کے مطابق امریکی صدر ڈونلڈ ٹرمپ کے دورہ بھارت کے موقع پر سوشل میڈیا پر کچھ ایسی افواہیں گردش کررہی ہیں جن میں دعویٰ کیا جارہا ہے کہ امریکی صدر ٹرمپ پاکستان بھی آئیں گے تاہم پاکستانی وزارت خارجہ نے ایسی تمام خبروں کی تردید کردی ہے۔
اس حوالے سے ترجمان دفتر خارجہ عائشہ فاروقی نے اپنے وضاحتی بیان میں اس بات کی تردید کرتے ہوئے کہا ہے کہ امریکی صدر ٹرمپ کے دورہ بھارت کے دوران دورہ پاکستان کی خبریں درست نہیں۔
ترجمان دفتر خارجہ عائشہ فاروقی کا مزید کہنا تھا کہ امریکا اور افغان طالبان میں امن معاہدے پر دستخط کے اعلان کا خیرمقدم کرتے ہیں، امید ہے امن معاہدے پر دستخط کے بعد افغان دھڑوں میں مذاکرات بحال ہونگے اورافغانستان میں امن بحال ہوگا۔
مزید پڑھیں : ڈونلڈ ٹرمپ کو بندروں سے محفوظ رکھنے کیلئے منکی فورس تشکیل
یاد رہے کہ امریکی صدر ڈونلڈ ٹرمپ بھارت کے دوروزہ دورے پر نئی دہلی میں موجود ہیں۔
