اسلام آباد : ترجمان دفتر خارجہ نے بھارتی قیادت کی پاکستان مخالف مہم کو افسوسناک اور الزمات کو بے بنیاد قرار دیا ہے۔
تفصیلات کے مطابق بھارتی وزیراعظم نریندرمودی کے بیان پر دفترِخارجہ نے ردِعمل کا اظہار کرتے ہوئے بھارتی قیادت کے الزامات کو بے بنیاد قرار دیا ہے۔
ترجمان دفتر خارجہ نے ایک بیان میں کہا ہے کہ بھارتی قیادت کی پاکستان کے خلاف مہم افسوسناک ہے اور بھارتی قیادت پاکستان پر بے بنیاد الزامات لگا رہی ہے، بھارت پاکستان میں دہشتگردی کو فروغ دے رہا ہے، جس کا ثبوت بھارتی جاسوس کلبھوشن کے بیانات ہیں۔
نفیس زکریا کا کہنا ہے کہ بھارتی قیادت پاکستان کے خلاف اشتعال انگیز بیانات دیتی رہتی ہے، جس کا مقصد دنیا کی توجہ مقبوضہ کشمیر میں بھارتی مظالم سے ہٹانا ہے۔
انکا کہنا تھا کہ بھارت ریاستی پالیسی کے تحت دہشت گردی کی پشت پناہی کررہا ہے اور مقبوضہ وادی میں نہتے کشمیریوں کی آواز کو جبر سے دبانے کی کوشش کررہا ہے۔
ترجمان دفتر خارجہ کا مزید کہنا ہے کہ عالمی برادری نے بھی مقبوضہ کشمیر میں بھارتی ظلم و ستم کا نوٹس لیا ہے جبکہ اقوام متحدہ سمیت بہت سے ممالک نے بھی نہتے کشمیریوں اور مقبوضہ کشمیر کی صورتحال پر تشویش کا اظہار کیا ہے۔
