اسلام آباد : پاکستانی دفتر خارجہ نے پی ٹی آئی پر پابندی کے معاملے پر امریکا کے درعمل پر مؤقف میں کہا کہ کسی سیاسی جماعت پر پابندی پاکستان کا داخلی معاملہ ہے۔
تفصیلات کے مطابق دفتر خارجہ کی ترجمان ممتاز زہرا بلوچ نے ہفتہ وار پریس بریفنگ سے خطاب کرتے ہوئے پی ٹی آئی پر پابندی کے معاملے پر امریکا کے درعمل پر کہا کہ کسی سیاسی جماعت پر پابندی پاکستان کا داخلی معاملہ ہے،دوسرے ملکوں کو تبصروں سے گریز کرنا چاہییے۔
ترجمان کا کہنا تھا کہ پی ٹی آئی سےمتعلق سپریم کورٹ فیصلے نے پاکستان کےجوڈیشل سسٹم کی مضبوطی کوواضح کیا، پاکستان اپنے اندرونی مسائل خود حل کرسکتا ہے۔
یاد رہے امریکا نے پاکستان میں سیاسی جماعت پر پابندی سے متعلق فیصلے پر تشویش کا اظہار کیا تھا۔
ترجمان امریکی محکمہ خارجہ میتھیو ملر کا کہنا تھا کہ کسی سیاسی جماعت پر پابندی تشویش کا باعث ہے سیاسی جماعت پر پابندی سے متعلق حکومتی بیانات دیکھتے ہیں، لگتا ہے یہ پیچیدہ سیاسی عمل کا آغاز ہے۔
