جنیوا: وزیر خارجہ شاہ محمود قریشی نے کہا ہے کہ مقبوضہ کشمیر میں بھارتی مظالم اور بربریت بے نقاب ہورہی ہے۔
تفصیلات کے مطابق وزیر خارجہ شاہ محمود قریشی تین روزہ دورے پر جنیوا پہنچ گئے، وزیر خارجہ نے میڈیا سے گفتگو کرتے ہوئے کہا کہ دنیا دیکھ رہی ہے مقبوضہ کشمیر میں ظلم و بربریت طاری ہے۔
انہوں نے کہا کہ آج انسانی حقوق سے متعلق کانفرنس ہوئی ہے، ہیومن رائٹس کمیشن کے چیئرمین کی جانب سے بیان دیا گیا ہے، چیئرمین ہیومن رائٹس کمیشن کی جانب سے بیان حوصلہ افزا ہے۔
وزیر خارجہ نے کہا کہ جو ہم کہتے آئے ہیں آج ہیومن رائٹس کونسل کے آغاز پر اس کا اظہار ہوا ہے، اجلاس میں انسانی حقوق، کرفیو کے خاتمے سے متعلق بات ہوئی ہے۔
مزید پڑھیں: مقبوضہ کشمیرکے لیے ایمنسٹی انٹرنیشنل کی کشمیرکو بولنے دو مہم
شاہ محمود قریشی نے کہا کہ کمیونی کیشن بلیک آؤٹ کے خاتمے کی بات ہوئی، مقبوضہ کشمیر میں سلب کیے گئے بنیادی حقوق کی بحالی کا مطالبہ کیا گیا۔
وزیر خارجہ شاہ محمود قریشی نے کہا کہ انشا اللہ آئندہ دو روز میں یہاں سے بھارت کو واضح پیغام دیا جائے گا۔
واضح رہے کہ مقبوضہ کشمیر میں آج مسلسل 36ویں روز بھی کرفیو برقرار ہے اور مواصلات کا نظام مکمل پر معطل ہے، قابض انتظامیہ نے ٹیلی فون سروس بند کررکھی ہے جبکہ ذرائع ابلاغ پرسخت پابندیاں عائد ہیں۔
کشمیرمیڈیا سروس کے مطابق مواصلاتی نظام کی معطلی، مسلسل کرفیو اور سخت پابندیوں کے باعث لوگوں کو بچوں کے لیے دودھ، زندگی بچانے والی ادویات اور دیگر اشیائے ضروریہ کی شدید قلت کا سامنا ہے۔
