لندن: انگلش ٹیم کے سابق کپتان نے ایک اور بڑا اعزاز اپنے نام کرکے سن 2018 کو اپنے لیے یادگار بنا لیا۔
تفصیلات کے مطابق انگلینڈ کرکٹ ٹیم کے سابق کپتان الیسٹر کک کو ‘سر’ کے خطاب سے نوازا گیا ہے، ریکارڈ ساز بلے باز ‘سر’ کا خطاب حاصل کرنے والے گیارہویں انگلش کرکٹر ہیں۔
الیسٹر کک نے ستمبر 2018 میں بھارت کے خلاف ہوم سیریز کے آخری ٹیسٹ میچ کے بعد ریٹائرمنٹ کا اعلان کیا تھا۔
سابق انگلش کپتان کا شمار عہد جدید کے نمایاں کھلاڑیوں میں ہوتا ہے، انھوں نے160 ٹیسٹ، 92 ون ڈے اور 4 ٹی ٹوئنٹی میچز میں انگلینڈ کی نمائندگی کی۔
ٹیسٹ کرکٹ میں انھوں نے 12 ہزار رنز کا ہندسہ عبور کیا۔ ون ڈے میں انھوں نے 3 ہزار بنائے۔
مزید پڑھیں: ہیڈ کوچ مکی آرتھر کے غصے کی وجہ سامنے آگئی
انھوں نے ٹیسٹ کرکٹ میں 32 سنچریاں اور 56 نصف سنچریاں اسکور کیں، ایک روزہ کرکٹ میں انھوں نے 5 سنچریاں اور 19 نصف سنچریاں بنائیں۔
25 دسمبر 1984 کو پیدا ہونے والے بلے باز کو اب حکومت برطانیہ نے سر کا خطاب عطا کیا ہے۔
انڈیا کے خلاف اپنا آخری ٹیسٹ کھیلنے والے اس بلے باز نے یکم مارچ 2006 کو انڈیا ہی کے خلاف اپنا پہلا ٹیسٹ کھیلا تھا۔
یہ امر بھی دل چسپ ہے کہ سری لنکا کے خلاف پہلا ون ڈے کھیلنے والا یہ کھلاڑی اسی ایشیائی ٹیم کے خلاف آخری بار ون ڈے کھیلنے کے لیے میدان میں اترا تھا۔
