لاہور: پاکستان میں قومی وومن کرکٹ شروع کرنے اوربین الاقوامی سطح پر پاکستان کی نمائندگی کرنے والی سابق کرکٹرشرمین خان انتقال کرگئیں، ان کی تدفین آج لاہور میں ہوگی۔
تفصیلات کے مطابق وومن کرکٹ کی سابق نامور کھلاڑی دو دن قبل انگلینڈ سے واپس آئی تھیں اور نمونیا کے مرض میں مبتلا تھیں ، ان کا انتقال گزشتہ روز لاہور میں ہوا، انتقال کے وقت ان کی عمر 46 سال تھی ۔
شرمین اور ان کی بہن شازیہ نے پاکستان کی پہلی انٹرنیشنل وومن کرکٹ ٹیم تشکیل دی تھی ۔ شرمیں سیدھے ہاتھ سے بلے بازی کرتی تھیں اور فاسٹ باؤلر تھیں۔انہوں نے دو ٹیسٹ اور 26 ایک روزہ بین الاقوامی میچز میں پاکستان کی نمائندگی کی تھی۔
[bs-quote quote=”شرمین خان نے 26 ایک روزہ اور دوٹیسٹ میچز میں پاکستان کی نمائندگی کی” style=”style-5″ align=”left”][/bs-quote]
دونوں بہنوں نے نے برطانیہ سے تعلیم حاصل کی اور جب وہ 1992 کے ورلڈ کپ کا فائنل دیکھنے لارڈز گئیں تو انہیں خیال آیا کہ پاکستان کی وومن ٹیم بھی ہونی چاہیئے۔ ستمبر 1996 میں انہوں بین الاقوامی وومن کرکٹ کونسل سے پاکستان کے لیے ممبر شپ حاصل کی، جس کے بعد پاکستانی وومن کرکٹ ٹیم 1997 میں انڈیا میں ہونے والے ورلڈ کپ کے لیے کوالی فائی کرگئی۔
شرمین نے اپنا پہلا ایک روزہ میچ نیوزی لینڈ کے خلاف کرائسٹ چرچ میں جنوری 1997 میں کھیلا جبکہ انہوں نے اپنا آخری ایک روزہ میچ سری لنکا کے خلاف موراتوا میں جنوری 2002 کو کھیلا۔ اپریل 1998 میں انہوں نے کولمبو میں سری لنکا کے خلاف اپنا پہلا ٹیسٹ میچ کھیلا جبکہ دوسرا اور آخری ٹیسٹ میچ انہوں نے دو سال بعد ڈبلن میں آئرلینڈ کے خلاف کھیلا۔
سابق کھلاڑی شرمین خان نے پاکستان میں وومن کرکٹ متعارف کرانے میں اہم کردار اداکیا، انہوں نے 28 میچز میں پاکستان کی نمائندگی کی۔مرحومہ کے اہل ِ خانہ کے مطابق شرمین خان کی تدفین دوپہرکولاہورمیں ہوگی۔
صرف شرمین خان ہی نہیں بلکہ ان کے والد بھی وومن کرکٹ سپورٹ کرنے میں آگے آگے رہتے تھے ، نوے کی دہائی میں قومی سطح پر وومن کرکٹ کے فروغ میں ان کا اہم کردار ہے۔ قومی وومن کرکٹرز نے شرمین خان کی خدمات کو سراہتے ہوئے ان کی وفات پر گہرے دکھ اور رنج کا اظہارکیا ہے۔
