نیوپورٹ: فیس بک پر کسی ورلڈ چیمپئن باکسر کو بڑھکیں مار کر تنگ کرنا آسان ہو سکتا ہے لیکن جب بات رِنگ میں آتی ہے تو کیا حشر ہوتا ہے، اس کا اندازہ اس ویڈیو سے بخوبی لگایا جا سکتا ہے۔
فیس بک پر سابق ورلڈ چیمپئن باکسر گیون ریز کو ایک باکسر ڈینی سلگ نے تنگ کرنا شروع کیا، دی راک کے نام سے مشہور سابق چیمپئن نے 2014 میں باکسنگ سے ریٹائرمنٹ لے لی تھی، اور اس دوران انھوں نے کئی مواقع پر خود کو چوکور رِنگ میں آنے سے روکے رکھا۔
لیکن ڈینی سلگ نے جب انھیں مسلسل پریشان کیا اور وہ آن لائن ٹرولنگ سے باز نہ آیا تو ورلڈ باکسنگ ایسوسی ایشن (WBA) کے سپر لائٹ ویٹ ورلڈ چیمپئن نے دوبارہ گلوز پہننے کا فیصلہ کر لیا۔
آڈرین برونر اور اینتھونی کرولا جیسے باکسرز کے ساتھ مقابلہ کرنے والے گیون ریز نے مسلسل تنگ کرنے والے باکسر ڈینی سلگ کو چیلنج کر کے رِنگ میں مقابلے کی دعوت دے دی۔
Only sparred once in the last 4 years
Been constantly abused on Facebook by some rude
Took less than 30seconds to shut him up 🥊
Danny Slug think before u open tha trap again 🤫
This old man ain’t out yet 👊 pic.twitter.com/oCDpjzDSC9— gavin rees (@gavtherock) March 22, 2020
مقابلہ تو سج گیا لیکن یہ کیا، فیس بک پر بھڑکیاں مارنے والا باکسر، دی راک کے دو ہاتھ بھی برداشت نہ کر سکا اور چند ہی سیکنڈز کے اندر ڈھیر ہو گیا۔ گیون ریز نے اس مقابلے کا فوٹیج بھی شیئر کیا، جس میں دو ہاتھ کھانے کے بعد مقابل کا سارا جوش ٹھنڈا پڑتا نظر آیا، اور وہ خاک چاٹنے پر مجبور ہو گیا۔
فوٹیج کے مطابق مقابلہ شروع ہوا تو ڈینی سلگ نے بڑھ چڑھ کر سابقہ چیمپئن پر وار کیے، لیکن جیسے ہی گیون ریز نے اٹیک کیا، وہ مزید اپنے قدموں پر ٹک نہیں پایا، ریز کے دونوں ہاتھ ایک بار اس کے چہرے پر پڑے، اور پھر بایاں پنج جیسے ہی اس کے جگر کے مقام پر پڑا، وہ لڑکھڑا کر زمین بوس ہو گیا۔
