راولپنڈی: بانی پی ٹی آئی کی تھانہ نیو ٹاؤن میں درج مقدمے میں گرفتاری ڈال دی گئی۔
اے آر وائی نیوز کے مطابق مقدمہ جلاؤ گھیراؤ، پولیس سے مزاحمت، املاک کو نقصان سمیت دیگر دفعات پر درج ہے جس میں بانی پی ٹی آئی کی گرفتاری ڈالی گئی ہے۔
بانی پی ٹی آئی کیخلاف مقدمے میں انسداد دہشت گردی کی دفعات بھی شامل ہیں۔
ترجمان پولیس کا کہنا ہے کہ ایس ایس پی انویسٹی گیشن کی سربراہی میں تفتیشی ٹیم بانی پی ٹی آئی سے تفتیش کررہی ہے جبکہ بانی پی ٹی آئی کو کل جسمانی ریمانڈ کے حصول کے لیے عدالت میں پیش کیا جائے گا۔
واضح رہے کہ گزشتہ روز اسلام آباد ہائی کورٹ نے توشہ خانہ ٹو کیس میں بانی پی ٹی آئی کی ضمانت منظور کرتے ہوئے رہا کرنے کا حکم دیا تھا۔
دوران سماعت پراسیکیوٹر نے کہا ملزمان نے فرد جرم عائد کرنے کی کارروائی کے لیے تاخیری حربے استعمال کیے،ہم ٹرائل کورٹ کے حوالے سے بھی ملزمان کا کنڈیکٹ ریکارڈ پر لانا چاہتے ہیں، عدالت جوبھی فیصلہ کرےلیکن میڈیاپرپہلےسے ہے کہ ضمانت منظور ہوجائے گی۔
جسٹس گل حسن اورنگزیب نے کہا میڈیا کو چھوڑ دیں ان سے خود کو مستثنیٰ کرلیں، میڈیا میں کہا جاتا ہے جان کر بیمار ہوگیا، جان کر نہیں آیا۔
ایف آئی اے پراسیکیوٹر نے عدالت کو بتایا بلغاری سیٹ توشہ خانہ میں جمع ہی نہیں کرایا گیا، ریاست کے تحفے کی کم قیمت لگاکرریاست کونقصان پہنچایاگیا، بانی پی ٹی آئی اور ان کی اہلیہ دونوں نے فائدہ اٹھایا۔
جسٹس گل حسن نے سوال کیا عمران خان کو کیسے فائدہ ہوا؟ تو ایف آئی اے پراسیکیوٹر نے کہا جب بیوی کو فائدہ ملا تو شوہرکا بھی فائدہ ہوا۔
جس پر جسٹس گل حسن اورنگزیب نے کہا او پلیز،میری بیوی کی چیزیں میری نہیں ہیں،ہم پتہ نہیں کس دنیامیں ہیں، گزشتہ حکومت توشہ خانہ کی تفصیلات نہیں بتاتی تھی، ہم پوچھتے تھےتوتوشہ خانہ کی تفصیلات چھپائی جاتی تھیں۔
اسلام آباد ہائی کورٹ نے توشہ خانہ ٹو کیس میں عمران خان کی ضمانت منظور کرلی اور رہا کرنے کا حکم دیا۔
